Ritu Tawde : महापौरांच्या गाडीतून त्या नवजात बाळाचा झाला गृहप्रवेश

बाळंतिणीच्या मदतीला धावून गेल्या महापौर

मुंबई : मुंबईच्या महापौर रितू तावडे यांची प्रसारमाध्यमातून विविध प्रकारे बदनामी होत असतानाच त्यांच्या माणुसकीचे दर्शन गुरुवारी घडले. प्रसूत झालेली महिला रुग्णालयातून डिस्चार्ज घेवून बाळासह घरी निघालेली असतानाच त्यांना रिक्षा उपलब्ध होत नव्हती.पण त्याच वेळी त्या माता बाळाच्या मदतीला महापौर जावून गेल्या. महापौर रितू तावडे यांनी त्या बाळंतिणीला आणि तिच्या कन्येला स्वतःच्या महापौर वाहनात बसवले आणि सुरक्षितपणे खैरानी मार्ग (कुर्ला) येथे घरी पोहोचवले. वाहनात स्वतः नवजात कन्येला कुशीत घेऊन घरी जाताना तिला आईकडे सोपवले आणि भरभरून शुभेच्छा दिल्या, मातृ भावनेने त्यांना आशीर्वादही दिला. त्यामुळे त्या नवजात कन्येचा गृहप्रवेश हा थेट मुंबईच्या प्रथम नागरिक असलेल्या महापौरांच्या वाहनातून झाल्याने एकप्रकारे त्यांच्या कुटुंबांच्या आणि आसपासच्या शेजाऱ्यांच्या चेहऱ्यावर समाधान दिसून येत होते.

पावसाच्या सरी कोसळत असताना, सोबतीला जोरदार वारा वाहत असताना, घाटकोपरच्या संत मुक्ताबाई रुग्णालयाबाहेर एक आई आपल्या नवजात कन्येला घेऊन उभी होती. घरी जाण्याची घाई, हातात बाळ आणि तासभर वाट पाहूनही त्या दाम्पत्याला रिक्षा मात्र मिळत नव्हती. अशा वेळी, रुग्णालयातील पाहणी दौरा आटोपून बाहेर पडताना, मुंबईच्या महापौर रितू तावडे यांनी त्या नवजात कन्येचा रडण्याचा आवाज ऐकला. तिच्या आईच्या डोळ्यांतली काळजी पाहून महापौरांनी तिची विचारपूस केली. प्रसंग लक्षात येताच, क्षणाचाही विलंब न लावता रितू तावडे यांनी मदतीसाठी पुढाकार घेतला.

एक महिला म्हणून एका आईची वेदना त्यांनी तात्काळ ओळखली. महापौर रितू तावडे यांनी त्या बाळंतिणीला आणि तिच्या कन्येला स्वतःच्या महापौर वाहनात बसवले आणि सुरक्षितपणे खैरानी मार्ग (कुर्ला) येथे घरी पोहोचवले. वाहनात स्वतः नवजात कन्येला कुशीत घेऊन घरी जाताना तिला आईकडे सोपवले आणि भरभरून शुभेच्छा दिल्या, मातृ भावनेने आशीर्वाद दिला.

जन्म झाल्यानंतर रुग्णालयातून पहिल्यांदाच घराकडे निघालेल्या त्या चिमुकलीचा हा पहिला प्रवास थेट महापौरांच्या वाहनातून झाला, हा क्षण त्या बाळंतिणीसाठी, तिच्या कुटुंबासाठी भावनिक आणि संस्मरणीय ठरला. असा योग अत्यंत दुर्मीळ असल्याची भावना स्थानिक नागरिकांनी बोलून दाखवली.

महापौरांनी त्या बाळाला प्रेमाने भेट देत तिचे स्वागत केले. तर आईला शुभेच्छा देत तिच्या चेहऱ्यावर पुन्हा हसू फुलवले. या कृतीतून ‘कन्या हीच शक्ती’ आणि ‘माणुसकी हाच धर्म’ हा संदेश पुन्हा अधोरेखित झाला. त्याचप्रमाणे, या प्रसंगाने पुन्हा एकदा सिद्ध केले की, मोठेपण पदात नसते, ते मनात असते. मुंबईच्या महापौर रितू तावडे यांनी आपल्या कृतीतून ते पुन्हा एकदा सिद्ध केले आहे.