Bhuleshwar Ganpati Incident : मुंबईत २२ फूट उंच गणेशमूर्ती कोसळली; २ जणांचा मृत्यू, ५ जखमी

मुंबई : मुंबईच्या दक्षिण मुंबईतील भुलेश्वर परिसरात गणेशमूर्तीच्या आगमनादरम्यान मोठा अपघात झाला. तब्बल २२ फूट उंच ‘भुलेश्वरचा राजा’ गणेशमूर्ती अचानक कोसळल्याने दोन जणांचा मृत्यू झाला, तर पाच जण जखमी झाले. शनिवारी, २२ ऑगस्ट रोजी रात्री सुमारे ९ वाजून ५१ मिनिटांनी बलराम मर्चंट रोड, कबूतरखाना आणि जय अंबे चौक परिसरात ही दुर्घटना घडली. (Bhuleshwar Ganpati Incident)

मिळालेल्या माहितीनुसार, गणेशमूर्ती भायखळा येथून भुलेश्वरमधील मंडपाकडे नेण्यात येत होती. मंडपापासून अवघ्या ५० ते ६० मीटर अंतरावर असताना अचानक मूर्तीचा तोल गेला आणि ती खाली कोसळली. या दुर्घटनेनंतर परिसरात मोठी खळबळ उडाली. (Bhuleshwar Ganpati Incident)

घटनेची माहिती मिळताच बीएमसी अग्निशमन दल, मुंबई पोलीस, वाहतूक पोलीस, १०८ रुग्णवाहिका आणि बीएमसी वॉर्ड कर्मचाऱ्यांनी तातडीने घटनास्थळी धाव घेतली. जखमींना तात्काळ जवळच्या रुग्णालयात दाखल करण्यात आले. सध्या त्यांच्यावर उपचार सुरू असून सर्वांची प्रकृती स्थिर असल्याची माहिती अधिकाऱ्यांनी दिली. (Bhuleshwar Ganpati Incident)

जखमींवर विविध रुग्णालयांत उपचार सुरू

या दुर्घटनेत एकूण सात जण बाधित झाले असून त्यापैकी दोन जणांचा मृत्यू झाला आहे, तर पाच जखमींवर उपचार सुरू आहेत.

• जीटी रुग्णालयात तीन जणांना दाखल करण्यात आले होते. त्यापैकी एका व्यक्तीचा उपचारादरम्यान मृत्यू झाला असून दोन जखमींवर उपचार सुरू आहेत.


• रिलायन्स रुग्णालयात दाखल करण्यात आलेल्या एका व्यक्तीचा मृत्यू झाला.


• जे. जे. रुग्णालयात दोन जखमींवर उपचार सुरू आहेत.


• सैफी रुग्णालयात एका जखमीवर उपचार सुरू आहेत.

अपघाताचे कारण काय?

प्राथमिक तपासात रस्त्यावर मोठा खड्डा आढळून आलेला नाही. त्यामुळे मूर्तीचा तोल बिघडल्याने हा अपघात झाला असावा, असा प्राथमिक अंदाज पोलिसांनी व्यक्त केला आहे. मात्र, दुर्घटनेचे नेमके कारण शोधण्यासाठी पोलीस अधिक तपास करत आहेत. (Bhuleshwar Ganpati Incident)

मृत आणि जखमींची नावे :

या दुर्घटनेत संकेत नेवशे आणि बृजेश हेमंत जोशी यांचा मृत्यू झाला. तर वैभव घेनंद, पवन चौरसिया, लावण्या गनेर, दिव्या गनेर आणि कुणाल काशिद हे पाच जण जखमी झाले आहेत. मुंबईसह महाराष्ट्रभर गणेशोत्सव मोठ्या उत्साहात साजरा केला जातो. गणेशमूर्तींच्या आगमनावेळी भव्य मिरवणुका काढण्याची परंपरा मुंबईत अनेक वर्षांपासून आहे. मात्र, भुलेश्वरमधील या दुर्घटनेमुळे गणेशमूर्तींच्या वाहतुकीदरम्यान सुरक्षेचा प्रश्न पुन्हा ऐरणीवर आला आहे. (Bhuleshwar Ganpati Incident)