Pirates kidnap Indians : सागरी चाच्यांचा धुमाकूळ, २२ भारतीयांसह ३० जणांचे अपहरण; येमेन आणि सोमालियाच्या समुद्रातील धक्कादायक घटना

येमेन : येमेन आणि सोमालियाच्या किनाऱ्याजवळ घडलेल्या दोन वेगवेगळ्या घटनांमध्ये सागरी चाच्यांनी दोन व्यावसायिक जहाजांचे अपहरण केले. या दोन्ही जहाजांवर एकूण २२ भारतीय नागरिकांसह ३० क्रू सदस्य होते. एमटी सिबू 1 वर १६, तर एम/व्ही लुटुफवर सहा भारतीय नागरिक होते. सोमालियाजवळ अपहरण करण्यात आलेल्या जहाजावर तुर्कियेची शस्त्रे तसेच दळणवळण आणि उपग्रह उपकरणे होती. दरम्यान, एम/व्ही लुटुफ आणि त्यावरील क्रू सदस्यांची सध्याची स्थिती अद्याप स्पष्ट झालेली नाही.

शिपिंग मंत्रालयाच्या एका वरिष्ठ अधिकाऱ्याने सांगितले की, २० ऑगस्ट रोजी येमेनच्या किनाऱ्यापासून सुमारे ३० नॉटिकल मैल अंतरावर एडनच्या आखातात एरिट्रियाच्या ध्वजाखालील तेल उत्पादने वाहून नेणारे टँकर एमटी सिबू 1 सशस्त्र सागरी चाच्यांनी ताब्यात घेतले. या जहाजावर एकूण २० क्रू सदस्य होते, त्यापैकी १६ भारतीय नागरिक होते. अधिकाऱ्यांच्या माहितीनुसार, या घटनेनंतर भारतीय यंत्रणा परिस्थितीवर सातत्याने लक्ष ठेवून आहे. प्राथमिक माहितीनुसार, जहाजावरील भारतीय क्रू सदस्य सुरक्षित आहेत.

दुसरी घटना १७ ऑगस्ट रोजी सोमालियाच्या पुंटलँड किनाऱ्याजवळ घडली. येथे कॅमेरूनच्या ध्वजाखालील मालवाहू जहाज एम/व्ही लुटुफचे समुद्री चाच्यांनी अपहरण केले. या जहाजावर १० सदस्यांचा क्रू होता. त्यामध्ये सहा भारतीय नागरिक, तुर्कियेचा एक नागरिक, जॉर्जियाचा एक नागरिक आणि सर्बियाचे दोन सुरक्षा रक्षक होते. सोमाली अधिकाऱ्यांच्या माहितीनुसार, या जहाजाची मालकी पोलर मूव्हमेंट शिपिंगकडे असल्याचे सांगण्यात येते. अपहरण केल्यानंतर सागरी चाच्यांनी हे जहाज पुंटलँडमधील नुगाल किनाऱ्याच्या दिशेने नेले.

एका सोमाली अधिकाऱ्याने सांगितले की, सोमवारी पुंटलँडमधील ईयल जिल्ह्यात मारेया परिसरापासून सुमारे साडेतीन नॉटिकल मैल अंतरावर एम/व्ही लुटुफचा ताबा घेण्यात आला. प्रकरण संवेदनशील असल्यामुळे आपली ओळख सार्वजनिक करण्याची परवानगी नसल्याचे या अधिकाऱ्याने सांगितले.

अधिकाऱ्यांच्या माहितीनुसार, एम/व्ही लुटुफमधून तुर्कियेची शस्त्रे वाहून नेली जात होती. ही शस्त्रे मोगादिशूमधील तुर्कियेच्या लष्करी प्रशिक्षण केंद्रात पोहोचवली जाणार होती. जहाजावर दळणवळण आणि उपग्रह उपकरणेही होती. या घटनेबाबत तुर्कियेच्या अधिकाऱ्यांकडून तत्काळ कोणतीही अधिकृत प्रतिक्रिया देण्यात आलेली नाही. सोमाली अधिकाऱ्यांच्या माहितीनुसार, सुमारे आठ सागरी चाच्यांनी एम/व्ही लुटुफचा ताबा घेतला. हाच गट २६ एप्रिल रोजी एम/व्ही स्वार्डच्या अपहरणातही सहभागी असल्याची शक्यता व्यक्त केली जात आहे. अपहरणानंतर सागरी चाच्यांनी जहाजाला पुंटलँडमधील डांगोरोयो जिल्ह्यातील गारमालजवळील किनाऱ्याच्या दिशेने नेले. या काळात परिसरातील हालचाली वाढल्या आणि जहाजावर देखरेखही सुरू करण्यात आली. त्यानंतर तुर्कियेच्या मालकीची दोन जहाजे अपहरण करण्यात आलेल्या जहाजाजवळ पोहोचली. परिसरात तुर्कियेची हेलिकॉप्टर आणि ड्रोनद्वारेही निगराणी सुरू होती.मंगळवारी दोन जणांना घेऊन एक छोटी बोट अपहरण करण्यात आलेल्या जहाजाजवळ पोहोचली आणि त्यांनी तेथे ‘खाट’ पोहोचवले. सोमालियात ‘खाट’ हे उत्तेजक पदार्थ म्हणून ओळखले जाते, जे चघळले जाते.

सोमाली अधिकाऱ्यांच्या माहितीनुसार, छोटी बोट किनाऱ्यावर परतल्यानंतर परिसरात हवाई हल्ला झाला. या हल्ल्यात चार जणांचा मृत्यू झाला, तर अन्य दोन जण जखमी झाले. मात्र, या हल्ल्याच्या परिस्थितीची स्वतंत्रपणे पुष्टी होऊ शकलेली नाही. तसेच हा हल्ला नेमका कोणी केला आणि मृत व्यक्ती जहाजाच्या अपहरणात सहभागी असलेले सागरी चाचे होते की नाही, हेही स्पष्ट झालेले नाही.

एम/व्ही लुटुफ, त्यावरील क्रू सदस्य आणि जहाजावर लादलेल्या मालाची सध्याची स्थिती अद्याप स्पष्ट झालेली नाही. पण ताज्या घडामोडींमुळे एडनचा आखात आणि सोमालियाच्या आसपासच्या सागरी सुरक्षेबाबत पुन्हा एकदा चिंता वाढली आहे. विशेषतः या जहाजांवर भारतीय क्रू सदस्य असल्याने त्यांची सुरक्षित सुटका आणि मायदेशी पाठवणी करणे ही भारतीय अधिकाऱ्यांसाठी सर्वोच्च प्राथमिकता आहे.