Amruta Khanvilkar : 'वैयक्तिक आयुष्याबाबत अफवा पसरवणाऱ्यांना आता थेट ...'; अमृता खानविलकरच्या 'या' निर्णयाची सर्वत्र चर्चा

मुंबई : मराठमोळी अभिनेत्री अमृता खानविलकर (Amruta Khanvilkar) गेल्या काही दिवसांपासून तिच्या खासगी आयुष्याबाबत सोशल मीडियावर सुरू असलेल्या चर्चांमुळे प्रकाशझोतात आहे. तिच्याबद्दल विविध प्रकारच्या अफवा आणि दावे सोशल मीडियावर पसरत असल्याचे समोर आल्यानंतर अमृताने आता याविरोधात कायदेशीर पाऊल उचलण्याचा इशारा दिला आहे.

अमृता (Amruta Khanvilkar) सोशल मीडियावर मोठ्या प्रमाणात सक्रिय असते. ती आपल्या कामासोबतच विविध ठिकाणचे फोटो आणि व्हिडीओ चाहत्यांसोबत शेअर करत असते. त्यामुळे तिच्या वैयक्तिक आयुष्याबाबतही सोशल मीडियावर चर्चा होताना दिसते. मात्र, आता काही पोस्ट आणि मजकुरांवर अमृताने आक्षेप घेतला आहे.

‘असत्य आणि बदनामीकारक मजकूर प्रसारित करू नका’ :

अमृताने (Amruta Khanvilkar) तिच्या अधिकृत सोशल मीडिया अकाऊंटवर ‘अधिकृत कायदेशीर निवेदन’ शेअर केले आहे. हे निवेदन 10 ऑगस्ट 2026 पासून लागू असल्याचे त्यात नमूद करण्यात आले आहे. या निवेदनानुसार, अमृता खानविलकर यांच्या वैयक्तिक आयुष्याशी संबंधित असत्य, निराधार, बदनामीकारक किंवा गोपनीयतेचा भंग करणारा मजकूर ऑनलाइन आणि सोशल मीडिया माध्यमांवर प्रसारित केला जात असल्याचे निदर्शनास आले आहे.

अफवा पसरवणाऱ्यांवर कारवाईचा इशारा :

निवेदनात पुढे स्पष्ट करण्यात आले आहे की, अभिव्यक्ती स्वातंत्र्याचा गैरवापर करून एखाद्या व्यक्तीची बदनामी करणारी माहिती, अफवा किंवा खोटी माहिती तयार करणे, प्रसारित करणे किंवा शेअर करणे आढळल्यास उपलब्ध पुराव्यांच्या आधारे संबंधित व्यक्ती किंवा संस्थेविरुद्ध कायदेशीर कारवाई केली जाईल. अमृताच्या कायदेशीर टीमकडून हे निवेदन सोशल मीडियावर शेअर करण्यात आले आहे. मात्र, कोणत्या विशिष्ट पोस्ट किंवा व्यक्तींविरोधात कारवाई केली जाणार आहे, याबाबत निवेदनात स्पष्ट माहिती देण्यात आलेली नाही. (Amruta Khanvilkar)

चाहत्यांकडून अमृताच्या निर्णयाचे कौतुक :

अमृताने (Amruta Khanvilkar) घेतलेल्या या भूमिकेचे तिचे चाहते कौतुक करत आहेत. सेलिब्रिटींच्या खासगी आयुष्याबाबत सोशल मीडियावर कोणतीही माहिती पडताळणी न करता पसरवली जाते. अशा परिस्थितीत अफवा आणि खोट्या माहितीविरोधात अमृताने घेतलेली भूमिका महत्त्वाची मानली जात आहे. आता अमृताच्या या कायदेशीर इशाऱ्यानंतर तिच्याबाबत सोशल मीडियावर सुरू असलेल्या चर्चांना कितपत आळा बसतो आणि प्रत्यक्षात कोणती कारवाई केली जाते, याकडे चाहत्यांचे लक्ष लागले आहे. (Amruta Khanvilkar)