ठाणे : माजिवडा येथील वसंत लॉन्स या उच्चभ्रू सोसायटीत राहणाऱ्या ७७ वर्षीय महिलेचा बुधवारी (५ ऑगस्ट २०२६) दुपारी २१ व्या मजल्यावरून पडून मृत्यू झाला. ही दुर्घटना आहे की हत्या की आत्महत्या या प्रकरणी पोलीस तपास सुरू आहे. कुमुधा शेट्टी असे मृत महिलेचे नाव आहे. वर्तकनगर पोलीस पुढील कायदेशीर कारवाई करत आहेत.
वसंत लॉन्समधील सवाना टॉवर या २३ मजली इमारतीत २१ व्या मजल्यावरील फ्लॅटमध्ये कुमुधा शेट्टी वास्तव्यास होत्या. बुधवारी दुपारी सुमारे ३.४५ च्या सुमारास त्या सदनिकेच्या सज्जामधून दुसऱ्या मजल्यावरील पोडियमवरील भागात पडल्या. उंचावरून पडल्याने त्यांच्या डोक्याला गंभीर दुखापत होऊन त्यांचा जागीच मृत्यू झाला. या घटनेची माहिती मिळताच वर्तनगर पोलिसांसह ठाणे अग्निशमन दलाचे पथक घटनास्थळी पोहोचले.
अग्निशमन दलाच्या जवानांनी पोडियमवरून मृतदेह खाली आणला. या प्रकरणी मृत व्यक्तीने लिहिलेली कोणतीही चिठ्ठी पोलिसांना अद्याप मिळालेली नाही. यामुळे ही दुर्घटना आहे की हत्या की आत्महत्या या प्रकरणी पोलीस तपास सुरू आहे. कुमुधा शेट्टी यांचा मुलगा एका मोठ्या कंपनीत वरिष्ठ पदावर कार्यरत आहे.
