Uttarkhand Suicide : लग्नानंतर अवघ्या ८ महिन्यांत शिक्षिकेची आत्महत्या; मृत्यूपूर्वीच्या व्हिडिओत सासरच्या छळाचा गंभीर आरोप

उत्तराखंड : सरकारी शाळेतील शिक्षिका सृष्टी कंधारी हिने लग्नानंतर अवघ्या आठ महिन्यांत (Uttarkhand Suicide) आत्महत्या केल्याची धक्कादायक घटना समोर आली आहे. मृत्यूपूर्वी तिने आपल्या आईसाठी एक भावनिक व्हिडिओ रेकॉर्ड करत सासरच्या मंडळींकडून होत असलेल्या मानसिक छळाचा गंभीर आरोप केला आहे. या प्रकरणी माहेरच्या कुटुंबीयांच्या तक्रारीवरून पोलिसांनी पती, सासू आणि नणंदेविरुद्ध गुन्हा दाखल केला असून पुढील तपास सुरू आहे. (Uttarakhand )

मिळालेल्या माहितीनुसार, सृष्टी कंधारी हिचा विवाह नोव्हेंबर २०२५ मध्ये सौरभ रतुरी याच्याशी झाला होता. आत्महत्येपूर्वी रेकॉर्ड केलेल्या व्हिडिओमध्ये ती रडत म्हणते, "आई, मला माफ कर. गेल्या सहा महिन्यांपासून मी सर्व सहन करत होते, पण आता माझ्याकडून होत नाही. या लोकांची मानसिकता कधीच बदलणार नाही. लग्नापासूनच मला सतत टोमणे मारले जात आहेत." (Teacher Suicide)

सृष्टीची आई सीमा कंधारी यांनी पोलिसांकडे दिलेल्या तक्रारीत आरोप केला आहे की, लग्नानंतर तिचा सातत्याने मानसिक छळ करण्यात आला. तिला वारंवार 'अशुभ' ठरवण्यात येत होते आणि घरातील प्रत्येक वाईट घटनेसाठी तिलाच जबाबदार धरले जात होते. (Crime News)

तक्रारीनुसार, लग्नानंतर काही महिन्यांनी सासऱ्यांना हृदयविकाराचा झटका आल्यानंतर छळ अधिक वाढला. एका पुजाऱ्याच्या सल्ल्यानंतर सृष्टी घरात दुर्दैव घेऊन आली असल्याचा समज कुटुंबीयांनी करून घेतला आणि तिचा मानसिक छळ सुरूच ठेवला, असा आरोप करण्यात आला आहे. सासऱ्यांच्या निधनानंतर हा त्रास आणखी वाढल्याचेही तक्रारीत नमूद करण्यात आले आहे.

या प्रकरणी पोलिसांनी सृष्टीचा पती, सासू आणि नणंद यांच्याविरोधात गुन्हा दाखल केला असून आत्महत्येमागील नेमके कारण आणि इतर बाबींचा सखोल तपास सुरू आहे.