वॉशिंग्टन : पाकिस्तानच्या बेकायदेशीर ताब्यात असलेल्या काश्मीरमध्ये (PoK) सध्या तिथल्या जनतेवर आणि आंदोलकांवर पाकला पाठिंबा असलेल्या यंत्रणांकडून अत्याचार सुरू आहेत. या हिंसक घटनेवर आंतरराष्ट्रीय वृत्तपत्र 'द न्यूयॉर्क टाईम्स'ने (NYT) एक रिपोर्ट प्रसिद्ध केला होता. मात्र, या बातमीच्या शीर्षकात (Headline) PoK ला "पाकिस्तानी काश्मीर" असा शब्दप्रयोग करण्यात आला. यावर भारतीय दूतावासाने कडक शब्दांत आक्षेप घेतला असून, हा शब्दप्रयोग अत्यंत "दिशाभूल करणारा आणि चुकीचा" असल्याचे ठणकावून सांगितले आहे.
नेमका आक्षेप काय आहे ?
Misleading and incorrect headline by @nytimes. There is no Pakistani Kashmir, only Pakistan occupied Kashmir.
The Union Territories of Jammu & Kashmir and Ladakh, have been, are and will always remain an integral and inalienable part of India. Pakistan has illegally occupied…
— India in USA (@IndianEmbassyUS) July 29, 2026
'द न्यूयॉर्क टाईम्स'ने या भागात सुरू असलेल्या स्थानिक निवडणुकांमधील हिंसेवर बातमी देताना "पाकिस्तानी काश्मीरमध्ये स्थानिक निवडणुकांच्या मतदानादरम्यान चकमकी" असे शीर्षक दिले होते. यावर अमेरिकेतील भारतीय दूतावासाने 'X' (ट्विटर) वर पोस्ट करत थेट उत्तर दिले. भारताने स्पष्ट केले की, "न्यूयॉर्क टाईम्सने दिलेले हे शीर्षक चुकीचे आहे. 'पाकिस्तानी काश्मीर' नावाचा कोणताही प्रदेश अस्तित्वात नाही; तो भाग म्हणजे भारताचा 'पाकिस्तान-व्याप्त काश्मीर' (PoK) आहे."
भारताची ठाम आणि स्पष्ट भूमिका
दूतावासाने आपल्या निवेदनात पुढे म्हटले आहे की, जम्मू-काश्मीर आणि लडाख हे केंद्रशासित प्रदेश भारताचा अविभाज्य आणि न वेगळा करता येणारा भाग आहेत आणि नेहमीच राहतील. पाकिस्तानने या प्रदेशातील काही भागांवर बेकायदेशीरपणे कब्जा केला आहे आणि आता तो तिथल्या हतबल आणि अन्यायग्रस्त लोकांवर हिंसेचा वापर करून त्यांचा आवाज दाबण्याचा प्रयत्न करत आहे.
वॉशिंग्टन : जॉर्डनमधील अमेरिकन लष्करी तळावरील हल्ल्यानंतर अमेरिकेने इराणविरोधात मोठी लष्करी मोहीम सुरू केली आहे. अमेरिकेच्या संरक्षण मंत्रालयाने ...
PoK मधील संघर्षामागील मुख्य कारणे
भारताने याआधीही स्पष्ट केले आहे की, PoK मध्ये पेटलेला असंतोष हा पाकिस्तान सरकारकडून गेल्या अनेक दशकांपासून सुरू असलेल्या आर्थिक शोषण, प्रशासकीय अत्याचार आणि अन्यायाचा थेट परिणाम आहे. तिथे पाकिस्तानच्या पोलीस आणि सुरक्षारक्षकांकडून आंदोलकांवर अमानुष अत्याचार केले जात आहेत, ज्याची नोंद भारताने गांभीर्याने घेतली आहे.
'द न्यूयॉर्क टाईम्स'च्या रिपोर्टमध्ये काय होते ?
'न्यूयॉर्क टाईम्स'च्या रिपोर्टनुसार, PoK मधील मीरपूर भागात एका नागरी हक्क संघटनेचे कार्यकर्ते पोलिसांच्या हिंसाचाराचा निषेध करण्यासाठी एकत्र आले होते. तिथे पोलीस आणि आंदोलकांमध्ये हिंसक चकमक झाली. बातमीत या भागाला 'पाक-प्रशासित काश्मीर' म्हटले गेले होते. याशिवाय, 'ह्युमन राईट्स कमिशन ऑफ पाकिस्तान' या स्वतंत्र मानवाधिकार संस्थेनेही या हिंसाचाराचा तीव्र निषेध करत, निष्पाप लोकांच्या मृत्यूची स्वतंत्र चौकशी करण्याची मागणी केली असल्याचे रिपोर्टमध्ये नमूद होते.
पाकिस्तानच्या कारवाईत ३० हून अधिक नागरिकांचा मृत्यू
गेल्या काही दिवसांत पाकिस्तानी सुरक्षा दलांनी केलेल्या गोळीबार आणि लाठीमारात ३० हून अधिक सामान्य नागरिकांचा मृत्यू झाला असून ३३ हून अधिक जण गंभीर जखमी झाले आहेत. 'जॉइंट अवामी ॲक्शन कमिटी' (JAAC) या संघटनेच्या नेतृत्वाखाली ही निदर्शने केली जात आहेत. महागाई, विजेचे अवाढव्य बिल, अन्नधान्याची टंचाई, राजकीय भेदभाव आणि अल्पसंख्याकांवर होणारे अत्याचार याविरोधात PoK मधील जनता रस्त्यावर उतरली आहे.
भारताचा निवडणुकांवर प्रश्नचिन्ह
रावलाकोट ते मुझफ्फराबाद दरम्यान JAAC च्या कार्यकर्त्यांनी काढलेल्या लाँग मार्चवर पाक सैन्याने अमानुष बळगावा केला. या घटनेत मारल्या गेलेल्यांमध्ये JAAC च्या मध्यवर्ती समितीचे सदस्य उमर नझिर यांचे बंधू उस्मान नझिर यांचाही समावेश आहे. भारताने मंगळवारी या निवडणुकांवर ताशेरे ओढताना म्हटले की, "PoK मध्ये निवडणुकांचे नाटक करून पाकिस्तान आपला बेकायदेशीर कब्जा लपवण्याचा आणि तेथील मानवाधिकारांच्या उल्लंघनावरून जगाचे लक्ष हटवण्याचा प्रयत्न करत आहे."