बेंगळुरू : आपल्या मुलाने उच्च शिक्षण घेऊन करिअरमध्ये यशस्वी व्हावे आणि आनंदाने संसार थाटावा, अशी प्रत्येक पालकाची इच्छा असते. परंतु, बेंगळुरूमध्ये कौटुंबिक वादातून एका बापानेच आपल्या पोटच्या मुलीवर कॉलेजच्या आवारातच सुऱ्याने प्राणघातक हल्ला केल्याची धक्कादायक घटना घडली आहे. जखमी झालेली मुलगी एका खाजगी कॉलेजमध्ये सहाय्यक प्राध्यापक (Assistant Professor) म्हणून कार्यरत आहे.
मिळालेल्या माहितीनुसार, २५ जुलै रोजी बेंगळुरूमधील एका खाजगी कॉलेजमध्ये लक्ष्मी दुर्गा नावाच्या प्राध्यापकेवर तिच्या वडिलांनी, म्हणजेच नागेंद्र याने चाकूने वार केले. या हल्ल्यात लक्ष्मी दुर्गा गंभीर जखमी झाली असून तिच्यावर सध्या रुग्णालयात उपचार सुरू आहेत. पोलिसांनी दिलेल्या माहितीनुसार, ही घटना दुपारी ३:०० वाजताच्या सुमारास घडली. आरोपी नागेंद्र हा आपल्या मुलीला भेटण्याच्या बहाण्याने कॉलेजमध्ये आला होता. तेथील कर्मचाऱ्यांनी त्याला विभागप्रमुखांच्या (HoD) केबिनमध्ये जाण्याची परवानगी दिली, जिथे लक्ष्मी दुर्गा उपस्थित होती. केबिनमध्ये प्रवेश करताच नागेंद्रने त्याच्यासोबत आणलेल्या सुऱ्याने लक्ष्मी दुर्गावर अचानक हल्ला चढवला. तिच्या पोटात, छातीवर आणि मानेवर अनेक वार करून तो तिथून पसार झाला. या रक्तबंबाळ अवस्थेत तिला तातडीने रुग्णालयात दाखल करण्यात आले. पोलिसांच्या प्राथमिक तपासात असा खुलासा झाला आहे की, हा जीवघेणा हल्ला एका जुन्या कौटुंबिक वादातून झाला आहे.
Shalarth ID Scam : राज्य शासनाची तब्बल १६० कोटी रुपयांची फसवणूक झालेल्या 'शालार्थ आयडी' घोटाळ्याच्या तपासाला आता अधिक वेग आला आहे. या प्रकरणात अटक करण्यात आलेला ...
आरोपी नागेंद्र हा व्यवसायने कॅब चालक आहे. तो गेल्या काही दिवसांपासून मुलीसाठी मुलगा शोधत होता. एका स्थळाशी बोलणे पक्के झाल्यानंतर नागेंद्रने मुलाच्या घरच्यांकडे तब्बल ४० लाख रुपयांची मागणी केली. "मी मुलीच्या शिक्षणावर आणि करिअरवर खूप मोठा खर्च केला आहे," असा दावा करत त्याने या पैशांचा हट्ट धरला होता. एवढ्यावरच न थांबता, नागेंद्रने लक्ष्मी दुर्गाचा महिन्याचा पूर्ण पगारही त्याच्याच हातात द्यावा, अशी अट घातली होती. वडिलांच्या या अयोग्य मागण्यांना आणि हट्टाला लक्ष्मी दुर्गा आणि तिच्या आईने कडाडून विरोध केला. याच मुद्द्यावरून घरात वारंवार भांडणे होत होती आणि कुटुंबातील संबंध पार बिघडले होते. याच रागातून अखेर बापाने हे टोकाचे पाऊल उचलले. या घटनेनंतर पोलिसांनी तात्काळ कारवाई करत आरोपी नागेंद्रला अटक केली आहे. त्याच्याविरोधात विविध कलमांन्वये गुन्हा दाखल करण्यात आला असून पोलिस या प्रकरणाचा अधिक तपास करत आहेत.
