FIDE Interim President : विश्वनाथन आनंद फिडेचे हंगामी अध्यक्ष

नवी दिल्ली : रशिया-युक्रेन युद्धाशी संबंधित युरोपियन युनियनच्या प्रतिबंधांच्या यादीत विद्यमान अध्यक्ष आर्काडी ड्वोरकोविच यांच्या नावाचा समावेश झाल्यानंतर, त्यांनी पदावरून बाजूला होण्याचा निर्णय घेतला आहे. यामुळे जागतिक बुद्धिबळ संघटना (फिडे)च्या हंगामी अध्यक्षपदाची धुरा पाच वेळा जागतिक अजिंक्यपद पटकावणारे विश्वनाथन आनंद यांनी स्वीकारली आहे. ड्वोरकोविच, जे मूळचे रशियाचे आहेत, त्यांनी ईयूच्या या निर्णयाला "सर्व मार्गांनी" आव्हान देण्याचा निर्णय घेतला आहे. ईयूच्या या कारवाईमुळे त्यांची खाती जप्त केली जाऊ शकतात आणि प्रवासावर बंदी येऊ शकते. (FIDE Interim President )

विश्वनाथन आनंद हे २०२२ पासून 'फिडे'चे उपाध्यक्ष म्हणून कार्यरत आहेत. फिडे परिषदेने एका निवेदनात म्हटले आहे की, "फिडेचे अध्यक्ष म्हणून आर्काडी ड्वोरकोविच यांनी आपले अधिकार, कर्तव्ये आणि विशेषाधिकार तात्पुरते निलंबित ठेवण्याच्या घेतलेल्या निर्णयाला फिडे परिषद स्वीकारते आणि पुष्टी देते." निवेदनात पुढे म्हटले आहे, "फिडे सनदच्या कलम १९.२ नुसार, जोपर्यंत ड्वोरकोविच स्विस आणि ईयूच्या सध्या लागू असलेल्या कायद्यांनुसार निर्बंधांच्या कक्षेत आहेत, तोपर्यंत फिडेचे उपाध्यक्ष आनंद विश्वनाथन हे हंगामी अध्यक्ष म्हणून काम पाहतील." (FIDE Interim President )

आपल्या निवेदनात ड्वोरकोविच यांनी ईयूचा हा निर्णय अन्यायकारक असल्याचे म्हटले आहे. "आज ईयूने माझे नाव २१ व्या निर्बंधांच्या यादीत समाविष्ट केल्याचा निर्णय जाहीर केला. हा निर्णय बेकायदेशीर आणि अन्यायकारक असल्याचे मी स्पष्टपणे सांगू इच्छितो, आणि या निर्णयाला सर्व शक्य मार्गांनी तात्काळ आव्हान दिले जाईल. मला खात्री आहे की न्यायाचा विजय होईल. तथापि, जोपर्यंत न्यायालयाचा कोणताही औपचारिक निकाल लागत नाही आणि/किंवा असा निर्णय रद्द किंवा दुरुस्त केला जात नाही, तोपर्यंत हे प्रतिबंध फिडेच्या स्थिर कार्यात अडथळा ठरवू शकतात. त्यामुळे, ईयू आणि स्विस कायदे व नियमांनुसार जोपर्यंत मी या प्रतिबंधांच्या कक्षेत असेन, तोपर्यंत फिडे अध्यक्ष म्हणून माझे अधिकार आणि कर्तव्ये तात्काळ प्रभावाने स्वेच्छेने निलंबित करण्याचा मी निर्णय घेतला आहे,'' असे ते म्हणाले.