रशिया : रशिया-युक्रेन युद्धाने आता अधिक भीषण आणि रक्तरंजित वळण घेतले आहे. युक्रेनकडून होणाऱ्या ड्रोन हल्ल्यांना चोख प्रत्युत्तर देण्यासाठी रशियन सैन्याने पुन्हा एकदा आपल्या भात्यातील अत्यंत जड आणि महाविनाशक शस्त्रांचा वापर सुरू केला आहे. रशियाने युक्रेनच्या झापोरिज्जिया प्रांतातील ओरिखोवे शहर आणि डोनेत्स्कमधील शचुरोवो परिसरात थेट FAB-३००० या ३ टनांच्या महाकाय ग्लाईड बॉम्बने भीषण हल्ला केला आहे. या हल्ल्याचा अंगावर काटा आणणारा व्हिडिओ सध्या जागतिक पातळीवर चर्चेचा विषय बनला आहे. रशियन संरक्षण मंत्रालयाने दावा केला आहे की, या अत्यंत शक्तिशाली बॉम्बस्फोटात युक्रेनच्या ६३ व्या मेकॅनाइज्ड ब्रिगेडचा तात्पुरता तळ पूर्णपणे उद्ध्वस्त झाला आहे. ( Russia Ukraine War)
रशियाच्या संरक्षण मंत्रालयाने दावा केला आहे की, या हल्ल्यात युक्रेनच्या ६३व्या मेकॅनाइज्ड ब्रिगेडचा तात्पुरता लष्करी तळ, दारूगोळा साठा आणि कमांड पोस्ट उद्ध्वस्त करण्यात आली. या दाव्याची स्वतंत्रपणे पुष्टी झालेली नाही. FAB-३००० हा रशियाच्या सर्वात वजनदार पारंपरिक ग्लाईड बॉम्बपैकी एक मानला जातो. सुमारे ३,००० किलो वजनाच्या या बॉम्बमध्ये जवळपास १.४ टन स्फोटके असतात. ग्लाईड किटमुळे हा बॉम्ब विमानातून लांब अंतरावरून अचूक लक्ष्यावर सोडता येतो, त्यामुळे रशियन लढाऊ विमानांना युक्रेनच्या हवाई संरक्षण व्यवस्थेच्या कक्षेबाहेर राहून हल्ला करणे शक्य होते.
- संशयित बाबाच्या दर्ग्यातून लिंबू, टाचण्या, सुगंधी द्रव्ये जप्त; अघोरी कृत्यांचा पोलिसांचा दावा मुंबई : उबाठा गटाचे नेते आणि सिंधुदुर्गचे माजी खासदार ...
‘डीप बॅटल’ रणनीतीचा वापर
रशियन सैन्याने हा हल्ला ‘डीप बॅटल’ रणनीतीअंतर्गत केल्याचे मानले जात आहे. या रणनीतीत आघाडीच्या मागील भागातील कमांड सेंटर, दारूगोळा डेपो आणि पुरवठा मार्गांवर हल्ले करून शत्रूची लढाऊ क्षमता कमकुवत करण्याचा प्रयत्न केला जातो. शचुरोवो, उस्तिनोवका आणि ब्लागोडातोवका परिसरातही अशाच प्रकारचे हल्ले झाल्याचा रशियाचा दावा आहे. ( Russian Air Strike)
युक्रेनसमोर मोठे आव्हान
रशियाकडे FAB-५००, FAB-१५०० आणि FAB-३००० अशा विविध क्षमतेचे ग्लाईड बॉम्ब मोठ्या प्रमाणात उपलब्ध आहेत. दुसरीकडे, अशा लांब पल्ल्याच्या हल्ल्यांना प्रभावीपणे रोखण्यासाठी आवश्यक हवाई संरक्षण प्रणालींसाठी युक्रेनला अजूनही पाश्चिमात्य देशांच्या मदतीवर अवलंबून राहावे लागत आहे. सध्या डोनेत्स्क, खार्किव आणि झापोरिज्झिया या आघाड्यांवर रशियाने आक्रमक मोहीम सुरू ठेवली असून युक्रेनला दारूगोळा, मनुष्यबळ आणि संरक्षण संसाधनांच्या कमतरतेचा सामना करावा लागत आहे.
जागतिक तणाव अधिक वाढण्याची भीती
मध्यपूर्वेत इराण-अमेरिका संघर्ष आणि युरोपमध्ये रशिया-युक्रेन युद्ध अशा दोन मोठ्या संघर्षांनी एकाच वेळी तीव्र रूप धारण केल्याने जागतिक सुरक्षेवरील चिंता वाढली आहे. सततच्या हवाई हल्ल्यांमुळे नागरिकांचे मोठे नुकसान होत असून, आंतरराष्ट्रीय समुदायाकडून युद्धविरामाचे आवाहन होत असले तरी संघर्ष शमण्याची कोणतीही चिन्हे अद्याप दिसत नाहीत.