Smriti Mandhana : लॉर्ड्सवर स्मृती मंधानाचा ऐतिहासिक विक्रम! ३०० आंतरराष्ट्रीय सामने खेळणारी भारताची तिसरी महिला क्रिकेटपटू

लंडन : भारतीय महिला क्रिकेट संघाची स्टार सलामीवीर स्मृती मंधाना (Smriti Mandhana) हिने लॉर्ड्सच्या ऐतिहासिक मैदानावर आणखी एका मोठ्या विक्रमाला गवसणी घातली आहे. इंग्लंडविरुद्ध सुरू असलेल्या सामन्यात मैदानात उतरताच मंधानाने भारतासाठी ३०० आंतरराष्ट्रीय सामने खेळण्याचा ऐतिहासिक टप्पा गाठला. हा मान मिळवणारी ती भारताची तिसरी महिला क्रिकेटपटू आणि एकूण १२वी भारतीय क्रिकेटपटू ठरली आहे. (Smriti Mandhana)

भारतीय महिला क्रिकेटमध्ये सर्वाधिक आंतरराष्ट्रीय सामने खेळण्याचा विक्रम सध्याची कर्णधार हरमनप्रीत कौर हिच्या नावावर आहे. हरमनप्रीतने आतापर्यंत ३७४ आंतरराष्ट्रीय सामने खेळले असून, माजी कर्णधार मिताली राज ३३३ सामन्यांसह दुसऱ्या स्थानावर आहे. आता स्मृती मंधानाने ३०० सामन्यांचा टप्पा पार करत या प्रतिष्ठित यादीत आपले नाव कोरले आहे. (Smriti Mandhana)

स्मृती मंधानाने भारतासाठी आतापर्यंत ९ कसोटी, १२० एकदिवसीय आणि १७१ टी-२० आंतरराष्ट्रीय सामने खेळले आहेत. तिच्या फलंदाजीने भारतीय महिला क्रिकेटला नवी ओळख मिळवून दिली आहे. तिच्या आंतरराष्ट्रीय कारकिर्दीत मंधानाने कसोटीत ६९१ धावा, एकदिवसीय क्रिकेटमध्ये ५४११ धावा, तर टी-२० आंतरराष्ट्रीय क्रिकेटमध्ये ४५३८ धावा केल्या आहेत. तिच्या नावावर कसोटीत २ शतके व ४ अर्धशतके, एकदिवसीय क्रिकेटमध्ये १४ शतके व ३५ अर्धशतके, तर टी-२० मध्ये १ शतक आणि ३५ अर्धशतके आहेत. (Smriti Mandhana)

भारतासाठी सर्वाधिक आंतरराष्ट्रीय सामने खेळलेल्या महिला क्रिकेटपटू : 
हरमनप्रीत कौर – ३७४ सामने
मिताली राज – ३३३ सामने
स्मृती मंधाना – ३०० सामने
झुलन गोस्वामी – २८४ सामने
दीप्ती शर्मा – २८० सामने (Smriti Mandhana)

लॉर्ड्सच्या ऐतिहासिक मैदानावर ३०० सामन्यांचा टप्पा गाठत स्मृती मंधानाने भारतीय महिला क्रिकेटच्या इतिहासात आणखी एक सुवर्ण अध्याय लिहिला आहे. तिच्या या उल्लेखनीय कामगिरीबद्दल क्रिकेटविश्वातून तिच्यावर अभिनंदनाचा वर्षाव होत आहे. (Smriti Mandhana)