Wimbledon 2026 : विम्बल्डनमध्ये सिनरची दणदणीत एंट्री! जोकोव्हिचचा सरळ सेटमध्ये पराभव; अंतिम फेरीत झ्वेरेव्हशी महामुकाबला

लंडन : विद्यमान विजेता जॅनिक सिनरने (Jannik Sinner) विम्बल्डन २०२६ (Wimbledon 2026) स्पर्धेच्या उपांत्य फेरीत टेनिसचा महान खेळाडू नोव्हाक जोकोव्हिच (Novak Djokovic) याचा एकतर्फी पराभव करत अंतिम फेरीत धडक मारली आहे. जगातील अव्वल मानांकित सिनरने सात वेळच्या विम्बल्डन विजेत्या जोकोव्हिचला ६-४, ६-४, ६-४ अशा सरळ सेटमध्ये पराभूत केले.

या विजयासह सिनरने यंदाच्या ऑस्ट्रेलियन ओपन उपांत्य फेरीतील पराभवाचा वचपाही काढला. फ्रेंच ओपनमध्ये झालेल्या निराशाजनक कामगिरीनंतर सिनरच्या फिटनेसवर उपस्थित झालेल्या सर्व प्रश्नांना त्याने आपल्या दमदार खेळातून उत्तर दिले. (Wimbledon 2026)

आता रविवारी होणाऱ्या अंतिम सामन्यात सिनरचा सामना दुसऱ्या मानांकित अलेक्झांडर झ्वेरेव्हशी होणार आहे. झ्वेरेव्हने दुसऱ्या उपांत्य फेरीत ब्रिटनच्या वाइल्ड कार्ड खेळाडू आर्थर फेरीचा ७-६ (७-०), ६-२, ६-४ असा पराभव करत प्रथमच विम्बल्डनच्या अंतिम फेरीत प्रवेश केला. (Wimbledon 2026)

फ्रेंच ओपनमध्ये पहिले ग्रँडस्लॅम विजेतेपद जिंकलेल्या झ्वेरेव्हसमोर आता सलग दुसरे ग्रँडस्लॅम जिंकण्याची संधी आहे. व्यावसायिक टेनिसच्या इतिहासात (१९६८ नंतर) पहिले ग्रँडस्लॅम जिंकल्यानंतर लगेचच पुढील ग्रँडस्लॅम जिंकणारा पहिला पुरुष खेळाडू बनण्याचे लक्ष्य त्याच्यासमोर आहे. (Wimbledon 2026)

मात्र, आकडेवारी सिनरच्या बाजूने आहे. सिनरने झ्वेरेव्हविरुद्धचे सलग नऊ सामने जिंकले असून, त्यांच्या शेवटच्या १४ सेटमध्येही सिनरनेच विजय मिळवला आहे. त्यामुळे अंतिम फेरीत सिनरला किंचित वरचष्मा मानला जात आहे. (Wimbledon 2026)

दुसरीकडे, ३९ वर्षीय नोव्हाक जोकोव्हिचसाठी हा पराभव मोठा धक्का मानला जात आहे. विक्रमी २५व्या ग्रँडस्लॅम जेतेपदाचे त्यांचे स्वप्न यंदाही अपूर्ण राहिले.
आता सर्वांचे लक्ष रविवारी होणाऱ्या अंतिम सामन्याकडे लागले असून, विद्यमान विजेता जॅनिक सिनर आपले जेतेपद कायम राखणार की झ्वेरेव्ह सलग दुसरे ग्रँडस्लॅम जिंकत इतिहास रचणार, याची उत्सुकता टेनिसप्रेमींमध्ये शिगेला पोहोचली आहे. (Wimbledon 2026)