Ketan Agrawal Murder Case : केतनच्या हत्येचे गुढ उकलणार! सिया गोयलची होणार लाय डिटेक्टर टेस्ट

केतन अग्रवाल हत्याकांडात सिया गोयलची होणार लाय डिटेक्टर टेस्ट? पोलिसांनी तयार केली १८ प्रश्नांची यादी

 

पुणे : केतन अग्रवाल (Ketan Agrawal Murder) हत्याकांडाच्या तपासात दररोज नवे खुलासे समोर येत आहेत. या प्रकरणातील मुख्य आरोपी सिया गोयल (Siya Goyal) आणि चेतन चौधरी (Chetan Chaudhary) यांची पोलिसांकडून चौकशी सुरू असली तरी दोघांकडून मिळणाऱ्या उत्तरांमध्ये विसंगती आढळत असल्याची माहिती समोर आली आहे. त्यामुळे तपास अधिक स्पष्ट करण्यासाठी सिया गोयलची लाय डिटेक्टर टेस्ट (Lie Detectot Test) घेण्याची तयारी पोलिसांनी सुरू केली आहे.



मिळालेल्या माहितीनुसार, या चाचणीसाठी पोलिसांनी संभाव्य १८ प्रश्नांची यादी तयार केली आहे. या प्रश्नांद्वारे केतन अग्रवालच्या मृत्यूपूर्वीच्या घडामोडी, सिया आणि चेतन यांच्यातील संपर्क तसेच कथित कटाचा उलगडा करण्याचा प्रयत्न केला जाणार आहे.

या प्रश्नांमध्ये सियाची ओळख, केतन अग्रवालसोबतचा साखरपुडा, चेतन चौधरीसोबतचे संबंध, १८ जून रोजी लोहगड येथे उपस्थिती, केतनला लोहगडला बोलावण्यामागील कारण, चेतनसोबत आधीच योजना आखली होती का, तसेच घटनेनंतर कोणतेही चॅट, कॉल रेकॉर्ड किंवा डिजिटल पुरावे हटवले का, यासारख्या मुद्द्यांचा समावेश आहे. (Lohgad)

याशिवाय, केतन अग्रवालला ढकलले होते का, त्याच्यावर इतर कोणी हल्ला करताना पाहिले का आणि त्याच्या मृत्यूबाबत अजून काही माहिती लपवली आहे का, असे प्रश्नही विचारले जाणार असल्याचे सांगितले जात आहे.



दरम्यान, लाय डिटेक्टर टेस्ट घेण्यासाठी संबंधित न्यायालयाची परवानगी आणि आरोपीची संमती आवश्यक असते. या प्रक्रियेनंतरच चाचणी केली जाऊ शकते. पोलिसांकडून या प्रकरणाचा तपास सुरू असून सर्व पुरावे तपासल्यानंतर पुढील कारवाई केली जाणार आहे.