Noida Massive Fire : नोएडातील 12 व्या मजल्यावरील फ्लॅटला भीषण आग; रहिवाशांमध्ये घबराट

नोएडा : नोएडातील सेक्टर ७४ परिसरातील आयव्ही काउंटी या निवासी सोसायटीमध्ये शुक्रवारी सकाळी भीषण आग (Massive Fire) लागल्याची घटना घडली. सोसायटीतील एका टॉवरच्या १२ व्या मजल्यावरील फ्लॅटमध्ये आग लागल्याने परिसरात काही काळ भीतीचे वातावरण निर्माण झाले. आगीमुळे मोठ्या प्रमाणात धूर पसरला असून दूरवरूनही काळ्या धुराचे लोट दिसत होते. (Noida Massive Fire) मिळालेल्या माहितीनुसार, सकाळच्या सुमारास रहिवाशांना फ्लॅटमधून धूर आणि आगीच्या ज्वाळा दिसू लागल्या. काही क्षणांतच आग अधिक भडकली आणि फ्लॅटच्या बाल्कनीतून ज्वाळा बाहेर येताना दिसल्या. ही घटना समोर येताच सोसायटीतील नागरिकांमध्ये घबराट पसरली. अनेक रहिवासी तातडीने इमारतीबाहेर आले आणि सुरक्षित ठिकाणी थांबले. सद्या या घटनेचा व्हिडिओ सोशल मीडियावर व्हायरल होत आहे. घटनेची माहिती मिळताच अग्निशमन दलाच्या अनेक गाड्या घटनास्थळी दाखल झाल्या. अग्निशमन कर्मचाऱ्यांनी त्वरित बचाव आणि आग नियंत्रणाची मोहीम सुरू केली. आग शेजारच्या फ्लॅटमध्ये किंवा इमारतीच्या इतर भागांमध्ये पसरू नये यासाठी विशेष खबरदारी घेण्यात आली. ही सोसायटी सेक्टर ११३ पोलीस ठाण्याच्या हद्दीत येत असून, पोलिसांनीही घटनास्थळी पोहोचून परिस्थितीचा आढावा घेतला. प्राथमिक माहितीनुसार, या घटनेत कोणतीही जीवितहानी झालेली नाही. तसेच कोणालाही दुखापत झाल्याचे वृत्त समोर आलेले नाही. अधिकारी सध्या इमारतीची तपासणी करत असून सर्व रहिवासी सुरक्षित असल्याची खात्री केली जात आहे. आगीमागचे नेमके कारण अद्याप स्पष्ट झाले नसून, आग कशामुळे लागली याचा तपास सुरू आहे. अग्निशमन दलाकडून आग पूर्णपणे विझवण्यासाठी प्रयत्न सुरू आहेत.