Mumbai Pune Expressway Accident : मुंबई पुणे एक्सप्रेस वे वर अपघात, दोघांचा मृत्यू

खोपोली : मुंबई पुणे एक्सप्रेस वे वर सोमवारी पहाटे अपघात झाला. ट्रक, कंटेनर आणि एर्टिगा यांच्या अपघातात दोन जणांचा घटनास्थळीच मृत्यू झाला.

मुंबईच्या दिशेने तांदूळ घेऊन एक ट्रक जात होता. या ट्रकच्या चालकाचे नियंत्रण सुटले. नियंत्रण सुटल्यामुळे ट्रक वेगाने खाद्य तेल घेऊन जात असलेल्या कंटेनरला मागून धडकला. ही धडक झाली त्याचवेळी त्या भागातून एक एर्टिगा कार जात होती. ही एर्टिगा पण अपघातात सापडली. बाजूने जाणाऱ्या एर्टिगा कारलाही धडक लागल्याने अपघाताची तीव्रता वाढली.

अपघातात गंभीर जखमी झालेल्या ट्रक चालक आणि क्लीनर यांचा घटनास्थळीच मृत्यू झाला. कंटेनर चालक किरकोळ जखमी झाला. एर्टिगा कारमधील एका प्रवाशाला गंभीर तर अन्य एकाला किरकोळ दुखापत झाली आहे. जखमींमध्ये लिलाबाई सस्ते (वय 80), मुकिंदा सस्ते (वय 56) आणि महेंद्र पाल (वय 39) यांचा समावेश आहे.

अपघातामुळे तांदुळाची पोती आणि खाद्यतेल रस्त्यावर सांडले. यामुळे काही वेळासाठी मुंबई पुणे एक्सप्रेस वे वरील चार मार्गिकांच्या वाहतुकीवर प्रतिकूल परिणाम झाला. वाहतुकीचा वेग मंदावला. वाहतूक पोलिसांनी आवश्यक ते उपाय करून परिस्थितीवर नियंत्रण मिळवले. जखमींना उपचारासाठी खोपोली ग्रामीण रुग्णालय तसेच एमजीएम रुग्णालय, कामोठे येथे हलविण्यात आले.