पुणे : पुण्यातील मध्यवर्ती भागात असलेल्या डेक्कन (Deccan) परिसरात पुन्हा एकदा ड्रिंक अँड ड्राईव्हची धक्कादायक घटना समोर आली आहे. भरधाव वेगात असलेली कार थेट गरवारे पुलाचे रेलिंग तोडून खाली कोसळल्याने परिसरात एकच खळबळ उडाली. या भीषण अपघातात सुदैवाने कोणतीही जीवितहानी झाली नसली, तरी पुण्यातील वाढत्या बेदरकार वाहनचालकांमुळे शहरातील रस्ते सुरक्षेचा प्रश्न पुन्हा ऐरणीवर आला आहे. या प्रकरणी पोलिसांनी १९ वर्षीय तरुणाविरोधात गुन्हा दाखल केला असून पुढील तपास सुरू आहे.
मिळालेल्या माहितीनुसार, ही घटना २५मे रोजी मध्यरात्रीनंतर साधारण १:३० वाजण्याच्या सुमारास छत्रपती संभाजी महाराजांच्या पुतळ्याजवळ घडली. आरोपी तरुण अथर्व अमित जैन हा जंगली महाराज रस्त्याने डेक्कन जिमखाना परिसरातून आपल्या कारने जात होता. रात्रीची वेळ असल्याने रस्त्यावर तुलनेने कमी वाहतूक होती. याचाच फायदा घेत आरोपीने भरधाव वेगात आणि अत्यंत बेदरकारपणे वाहन चालवले.
मंत्री नितेश राणे यांनी दिली खुशखबर; 'कॅन्डेला पी-१२' बोटीच्या चाचण्यांना जूनमध्ये सुरुवात मुंबई : मुंबईकरांचा प्रवास अधिक वेगवान आणि पर्यावरणपूरक ...
डेक्कन जिमखाना येथील गरवारे पुलावरून गुडलक चौकाच्या दिशेने जात असताना चालकाचे वाहनावरील नियंत्रण अचानक सुटले. त्यानंतर कारने पुलाच्या रेलिंगला जोरदार धडक दिली. गाडीचा वेग इतका प्रचंड होता की, पुलाचे लोखंडी रेलिंग तोडून कार थेट खाली कोसळली. हा अपघात इतका भीषण होता की मोठा आवाज झाल्याने परिसरातील नागरिक आणि इतर वाहन चालक घटनास्थळी धावून आले.
अपघातानंतर परिसरात काही काळ भीतीचे वातावरण निर्माण झाले होते. पुलाखाली कोणतीही व्यक्ती किंवा वाहन नसल्याने मोठी दुर्घटना टळली. अन्यथा या अपघातात अनेकांचा जीव जाऊ शकला असता, अशी चर्चा घटनास्थळी उपस्थित नागरिकांमध्ये होती. विशेष म्हणजे अपघाताच्या वेळी आरोपी तरुण दारूच्या नशेत असल्याचे पोलिसांच्या प्राथमिक तपासात समोर आले आहे.
Nashik Simhastha Kumbh Mela : आगामी सिंहस्थ कुंभमेळ्याच्या पार्श्वभूमीवर नाशिकमधील पायाभूत सुविधांच्या विकासावर भर दिला जात आहे. कुंभमेळ्यात भाविकांची गैरसोय होऊ ...
या प्रकरणी डेक्कन पोलीस ठाण्यात आरोपी अथर्व अमित जैन (वय १९) याच्याविरोधात गुन्हा दाखल करण्यात आला आहे. पोलिसांनी घटनास्थळी तातडीने धाव घेत आरोपीला ताब्यात घेतले असून त्याला नोटीस बजावण्यात आली आहे. तसेच अपघातग्रस्त कार (क्रमांक MH 31 FR 5863) जप्त करण्याची प्रक्रिया सुरू करण्यात आली आहे. पोलिसांनी घटनास्थळाचा पंचनामा करून पुढील तपास सुरू केला आहे.
दारूच्या नशेत वाहन चालवून स्वतःसह इतरांच्या जीवाला धोका निर्माण केल्याप्रकरणी आरोपीवर कठोर कायदेशीर कारवाई करण्यात येणार असल्याची माहिती पोलिसांकडून देण्यात आली आहे. पुण्यासारख्या वर्दळीच्या शहरात तरुणांकडून होणाऱ्या अशा बेदरकार वाहनचालकांमुळे नागरिकांमध्ये संतापाचे वातावरण निर्माण झाले आहे. पुण्यात वाढत्या ड्रिंक अँड ड्राईव्ह घटनांमुळे वाहतूक नियमांची अंमलबजावणी आणि रस्ते सुरक्षेचा मुद्दा पुन्हा चर्चेत आला आहे.