पिंपरी-चिंचवड : उद्योगनगरी पिंपरी-चिंचवडमधून (Pimpari-Chinchwad) महिलांच्या सुरक्षेवर प्रश्नचिन्ह उपस्थित करणारी एक संतापजनक आणि तितकीच धक्कादायक घटना समोर आली आहे. केवळ चारित्र्याच्या संशयावरून एका माथेफिरू तरुणाने आपल्या प्रेयसीला सार्वजनिक ठिकाणी गाठून अत्यंत अमानुषपणे मारहाण केली. एका कपड्यांच्या दुकानात घडलेला हा संपूर्ण प्रकार तेथील सीसीटीव्ही (CCTV) कॅमेऱ्यात कैद झाला आहे. या मारहाणीचा अस्वस्थ करणारा व्हिडिओ सध्या सोशल मीडियावर प्रचंड व्हायरल होत असून, अशा प्रवृत्तीच्या तरुणावर कठोर कारवाई करण्याची मागणी नागरिकांमधून केली जात आहे.
आधी क्रूरतेचा कळस, आणि नंतर...
<
पाटणा : बिहारच्या बरह उपविभागातून एक अत्यंत सुन्न करणारी घटना समोर आली आहे. आज पहाटेच्या सुमारास प्रसिद्ध अशा उमानाथ गंगा घाटावर (Umnath Ganga) प्रवाशांनी ...
व्हायरल झालेल्या सीसीटीव्ही फुटेजमधील दृश्ये अत्यंत भयानक आहेत. संशयाने पछाडलेला हा तरुण कपड्यांच्या दुकानात प्रवेश करतो आणि काहीही न बोलता थेट तरुणीवर हल्ला करतो. तो तिला दुकानातच ओढत आणून लाथा-बुक्क्यांनी आणि चापटांनी अत्यंत निर्दयीपणे मारहाण करू लागतो. मात्र, या थरारानंतर या घटनेत एक अजब वळण पाहायला मिळाले. तरुणीला बेदम झोडपल्यानंतर या विकृत तरुणाचा राग अचानक शांत झाला. त्याने त्याच दुकानाच्या फरशीवर गुडघे टेकले आणि थेट प्रेयसीचे पाय धरून तिची माफी मागण्यास सुरुवात केली. आधी अमानुष मारहाण आणि नंतर पाया पडण्याच्या त्याच्या या विचित्र वर्तनामुळे नेटीझन्स कमालीचे आश्चर्य व्यक्त करत आहेत.
पोलिसांची धाव, पण पीडित तरुणीचा तक्रार करण्यास नकार
हा भीषण व्हिडिओ सोशल मीडियाच्या माध्यमातून पोलिसांपर्यंत पोहोचताच, पिंपरी-चिंचवड पोलीस प्रशासनाने तत्परता दाखवत तातडीने तपास चक्रावून थेट संबंधित तरुणीला गाठले. पोलिसांनी पीडित तरुणीला धीर देत गुन्ह्याची नोंद करून कडक कायदेशीर कारवाई करण्याचे आश्वासन दिले. परंतु, या ठिकाणी पोलिसांनाही धक्का बसला. स्वतःवर इतका मोठा अत्याचार होऊन आणि भरबाजारात मारहाण सहन करूनही, संबंधित तरुणीने आपल्या प्रियकराविरुद्ध कोणतीही पोलीस तक्रार देण्यास स्पष्ट नकार दिला. "हा आमचा खाजगी आणि अंतर्गत वाद आहे," अशी भूमिका घेत तिने कायदेशीर प्रक्रियेपासून लांब राहणे पसंत केले.
नागरिक आणि महिला संघटना आक्रमक
तरुणीने घेतलेल्या या नरमाईच्या भूमिकेमुळे पोलिसांसमोर आता मोठा कायदेशीर पेच निर्माण झाला आहे. पीडित व्यक्तीने स्वतः तक्रार देण्यास नकार दिल्यामुळे पुढील पावले कशी टाकावीत, याबाबत पोलीस कायदेशीर सल्ला घेत आहेत. दुसरीकडे, या घटनेचा व्हिडिओ पाहून शहरातील नागरिक आणि विविध महिला संघटना कमालीच्या संतप्त झाल्या आहेत. "आज तक्रार नाही म्हणून अशा गुंडांना सोडून दिले, तर उद्या महिलांवर उघडपणे अत्याचार करण्याचे धाडस वाढेल," अशी भीती व्यक्त करत महिला संघटनांनी संबंधित माथेफिरू तरुणाला पोलिसांनी स्वतःहून (सुओ मोटो) गुन्हा दाखल करून धडा शिकवावा, अशी आग्रही मागणी केली आहे.