मुंबई : बॉलिवूडचा प्रसिद्ध अभिनेता रणवीर सिंह (Ranveer Singh) सध्या एका मोठ्या चित्रपट वादाच्या भोवऱ्यात अडकला आहे. 'डॉन ३' (Don 3 Movie) या बहुप्रतिक्षित चित्रपटातून ऐनवेळी माघार घेतल्यामुळे रणवीरच्या अडचणीत मोठी वाढ झाली आहे. चित्रपट निर्माते आणि दिग्दर्शक फरहान अख्तर याने रणवीर विरोधात 'फेडरेशन ऑफ वेस्टर्न इंडिया सिने एम्प्लॉईज' (FWICE) कडे अधिकृत तक्रार दाखल केली होती. या तक्रारीची दखल घेत FWICE ने रणवीर सिंहवर असहकार्याची (बॅन) कारवाई केल्याचे वृत्त समोर येत आहे. इतकेच नव्हे तर, या अचानक घेतलेल्या निर्णयामुळे झालेल्या नुकसानाची भरपाई म्हणून फरहान अख्तरने रणवीरकडे तब्बल ४० हजार कोटी रुपयांची मागणी केल्याचा खळबळजनक दावा केला जात आहे.
वादावर रणवीर सिंहची पहिली अधिकृत प्रतिक्रिया
या सर्व हाय-व्होल्टेज ड्राम्यानंतर आणि FWICE च्या निर्णयानंतर अखेर अभिनेता रणवीर सिंहच्या बाजूने पहिली प्रतिक्रिया समोर आली आहे. रणवीरच्या प्रवक्त्याने (Spokesperson) पत्रक जारी करत अभिनेत्याची बाजू मांडली आहे. प्रवक्त्याने म्हटले की, "रणवीर सिंहच्या मनात संपूर्ण फिल्म इंडस्ट्री आणि विशेषतः 'डॉन' फ्रँचायझीशी जोडलेल्या प्रत्येक व्यक्तीबद्दल प्रचंड आदर आहे. 'डॉन ३' बाबत सध्या ज्या काही घडामोडी आणि वाद सुरू आहेत, त्यावर रणवीरने जाणीवपूर्वक शांत राहण्याचा निर्णय घेतला आहे. व्यावसायिक पातळीवरील मतभेद आणि वैयक्तिक संबंध हे नेहमीच परिपक्वता, आदर आणि सन्मान राखूनच सोडवले गेले पाहिजेत, असे रणवीरचे स्पष्ट मत आहे."
मैसूर : बॉलिवूडचा लाडका आणि नेहमीच आपल्या सळसळत्या ऊर्जेसाठी ओळखला जाणारा आघाडीचा अभिनेता रणवीर सिंग (Ranveer Singh) सध्या त्याच्या चित्रपटांपेक्षा एका ...
अफवांवर बोलणे रणवीरने टाळले
अभिनेत्याच्या टीमने पुढे बोलताना अफवांवर नाराजी व्यक्त केली. ते म्हणाले, "सध्या या प्रकरणावरून सोशल मीडिया आणि माध्यमांमध्ये अनेक प्रकारच्या खोट्या कहाण्या आणि तर्कवितर्क लढवले जात आहेत. मात्र, रणवीरने अशा अफवांना जाहीरपणे उत्तर देणे किंवा या वादात पडणे कधीच गरजेचे समजले नाही. त्याचे पूर्ण लक्ष सध्या केवळ त्याच्या कामावर आणि आगामी बिग बजेट प्रोजेक्ट्सवर केंद्रित आहे. 'डॉन' फ्रँचायझीशी संबंधित सर्वांबद्दल त्याच्या मनात नेहमीच सद्भावना राहील आणि ही सीरिज भविष्यातही यशस्वी ठरावी, अशी त्याची प्रामाणिक इच्छा आहे. कोणत्याही कठीण प्रसंगात शांत राहून आणि संयम बाळगून परिस्थिती हाताळणे हा रणवीरचा स्वभाव आहे आणि यापुढेही तो हीच भूमिका कायम ठेवेल."
चित्रपट सुरू होण्यापूर्वीच 'डॉन ३' ला लागल होतं ग्रहण!
वास्तविक पाहता, 'डॉन ३' या चित्रपटाची घोषणा झाल्यापासूनच या प्रोजेक्टला एकामागून एक अनेक धक्के बसत आहेत. सुरुवातीला या चित्रपटात मुख्य अभिनेत्री म्हणून कियारा अडवाणीची निवड करण्यात आली होती, मात्र तिच्या प्रेग्नंसीच्या कारणास्तव तिने या चित्रपटातून माघार घेतली. त्यानंतर चित्रपटातील मुख्य व्हिलनच्या भूमिकेसाठी अभिनेता विक्रांत मेस्सीला विचारणा करण्यात आली होती, परंतु काही कारणांमुळे त्यानेही या भूमिकेसाठी नकार दिला. एकापाठोपाठ एक कलाकार चित्रपट सोडत असतानाच, आता थेट मुख्य अभिनेता असलेल्या रणवीर सिंहनेच माघार घेतल्यामुळे हा वाद विकोपाला गेला आहे.
शूटिंगच्या अवघ्या १० दिवस आधी रणवीरची माघार
सूत्रांनी दिलेल्या माहितीनुसार, दिग्दर्शक फरहान अख्तर आणि निर्माते रितेश सिधवानी यांनी असा दावा केला आहे की, चित्रपटाचे शूटिंग सुरू होण्यासाठी अवघे १० दिवस शिल्लक असताना रणवीर सिंहने अचानक या प्रोजेक्टमधून बाहेर पडण्याचा निर्णय घेतला. रणवीरने अलीकडेच 'धुरंधर' आणि 'धुरंधर: द रिव्हेंज' या चित्रपटांच्या प्रचंड यशानंतर 'डॉन ३' सोडल्याचे बोलले जात आहे. ऐनवेळी मुख्य अभिनेत्याने पाठ फिरवल्यामुळे चित्रपटाचे अतोनात आर्थिक नुकसान झाले आहे. याच नुकसानीची भरपाई म्हणून निर्मात्यांनी रणवीरकडे तब्बल ४० हजार कोटी रुपयांची मागणी केली आहे, जी रणवीरने अद्याप भरलेली नाही. आता या मोठ्या वादानंतर संपूर्ण बॉलिवूड इंडस्ट्री रणवीर सिंहबाबत काय अंतिम निर्णय घेते, याकडे सर्वांचे लक्ष लागले आहे.
