पुणे : पुण्यातून (Pune News) एक अत्यंत धक्कादायक बातमी समोर आली आहे. सिंहगड रस्ता (Sinhgad Area) परिसरातील एका सोसायटीमध्ये खेळण्यात मग्न असलेल्या एका सात वर्षांच्या निरागस बालकाचा लिफ्टमध्ये अडकून दुर्दैवी मृत्यू झाला आहे. सोमवारच्या रात्री घडलेल्या या थरारक घटनेने संपूर्ण पुणे शहरात शोककळा पसरली असून, बहुमजली इमारतींमध्ये राहणाऱ्या पालकांच्या चिंतेत मोठी भर पडली आहे.
नेमका थरार कसा घडला?
ही दुर्दैवी घटना सिंहगड रोडवरील निंबजनगर येथील 'रिद्धी सिद्धी अपार्टमेंट'मध्ये घडली. शिवांश शैलेश धूत (वय ७ वर्षे) असे या मृत पावलेल्या दुर्दैवी बालकाचे नाव आहे. रोजच्याप्रमाणे सोमवारी रात्री दहा वाजण्याच्या सुमारास शिवांश सोसायटीच्या आवारात आपल्या मित्रांसोबत खेळत होता. खेळण्याच्या नादात तो एकटाच लिफ्टमध्ये शिरला. त्याने वरच्या मजल्यावर जाण्यासाठी बटण दाबले आणि लिफ्ट सुरूही झाली. मात्र, दुसऱ्या मजल्यापर्यंत पोहोचण्याआधीच ही लिफ्ट अचानक दोन मजल्यांच्या मध्येच बंद पडून अडकली. इकडे शिवांश बराच वेळ उलटूनही खेळून परतला नसल्याने कुटुंबीय आणि शेजाऱ्यांनी त्याची शोधाशोध सुरू केली. तो कुठेच न दिसल्याने अखेर त्यांचा मोर्चा लिफ्टकडे गेला आणि तिथेच काहीतरी अघटित घडल्याचा संशय रहिवाशांना आला.
रत्नागिरी : रत्नागिरी तालुक्यातील जांभारी फाटा परिसर मंगळवारी सकाळी भीषण स्फोटाने हादरला. वाटद पोलीस चौकी हद्दीत लाकडे गोळा करण्यासाठी गेलेल्या एका ...
अखेर चिमुकल्याने प्राण सोडले
घटनेचे गांभीर्य ओळखून रहिवाशांनी तातडीने रात्री साडेअकराच्या सुमारास पोलीस आणि अग्निशमन दलाला पाचारण केले. माहिती मिळताच अग्निशमन दलाच्या जवानांनी तात्काळ घटनास्थळी धाव घेत बचावकार्य सुरू केले. शर्थीचे प्रयत्न करून आणि तांत्रिक बाबी हाताळून जवानांनी लिफ्टचे दरवाजे उघडले व शिवांशला बाहेर काढले. पण दुर्दैवाने तोवर खूप उशीर झाला होता. आत अडकल्यामुळे या चिमुकल्याने आपला जीव सोडला होता. अवघ्या सात वर्षांच्या हसऱ्या-खेळत्या मुलाचा असा अचानक आणि भयंकर मृत्यू झाल्याने सोसायटीच्या आवारात कुटुंबीयांनी एकच टाहो फोडला.
बिघाड की आणखी काही?
या हृदयद्रावक घटनेनंतर सिंहगड रोड पोलिसांनी घटनास्थळाचा पंचनामा करून अकस्मात मृत्यूची (ADR) नोंद केली आहे. वरिष्ठ पोलीस निरीक्षक विनय पाटणकर यांनी दिलेल्या माहितीनुसार, पोलीस या संपूर्ण प्रकरणाचा सखोल तपास करत आहेत. आश्चर्याची बाब म्हणजे, प्राथमिक तपासात लिफ्टमध्ये कोणताही मोठा तांत्रिक बिघाड आढळलेला नाही. तसेच, सोसायटीकडून या लिफ्टचे वेळोवेळी ऑडिट व नियमित देखभाल (Maintenance) केली जात असल्याची प्राथमिक माहिती समोर आली आहे. लिफ्ट व्यवस्थित होती तर अचानक ती मध्येच कशी थांबली? यामागे काही अज्ञात तांत्रिक त्रुटी होती की आणखी काही कारण? या प्रश्नांची उत्तरे शोधण्याचे आव्हान आता पोलिसांसमोर आहे. या एका घटनेने पुन्हा एकदा उंच इमारतींमधील लिफ्टच्या सुरक्षेचा आणि लहान मुलांच्या सुरक्षिततेचा अत्यंत गंभीर प्रश्न उभा केला आहे.