Rahul Narvekar : राज्यातील आमदारांच्या शिष्टमंडळाचा जपान दौरा रद्द

विधानसभा अध्यक्ष राहुल नार्वेकर यांचा निर्णय; पंतप्रधान नरेंद्र मोदी यांच्या आवाहनाला सकारात्मक प्रतिसाद

मुंबई : इराण आणि अमेरिका यांच्यात सुरू असलेल्या युद्धजन्य परिस्थितीमुळे उद्भवलेल्या इंधन टंचाईच्या पार्श्वभूमीवर, महाराष्ट्र विधिमंडळाने एक मोठा निर्णय घेतला आहे. पंतप्रधान नरेंद्र मोदी यांनी देशाला इंधन बचतीचे आणि काटकसरीचे जे आवाहन केले होते, त्याला प्रतिसाद देत विधानसभा अध्यक्ष राहुल नार्वेकर यांनी १२ आमदारांचा नियोजित जपान दौरा रद्द करण्याची घोषणा केली आहे.

पंतप्रधान नरेंद्र मोदी यांनी नुकतेच देशाला संबोधित करताना सांगितले होते की, भारताकडे मोठ्या तेल विहिरी नसल्याने आपण आयातीवर अवलंबून आहोत. जागतिक संकटामुळे इंधन पुरवठा विस्कळीत होण्याची शक्यता असल्याने पेट्रोल, डिझेल, गॅस आणि स्वयंपाकाच्या तेलाचा वापर जपून करावा. तसेच सार्वजनिक वाहतूक व्यवस्थेचा वापर वाढवावा, असे आवाहन त्यांनी केले होते. या आवाहनाचे गांभीर्य लक्षात घेऊन विधानसभा अध्यक्षांनी सरकारी खर्चात कपात आणि इंधन बचतीचा संदेश देण्यासाठी हा परदेश दौरा स्थगित केला आहे.

जपानमधील दोन राज्यांच्या राज्यपालांनी महाराष्ट्र विधिमंडळाच्या आमदारांना त्यांच्या राज्यांना भेट देण्याचे अधिकृत निमंत्रण दिले होते. या निमंत्रणानुसार, अभ्यासासाठी १२ आमदारांचे एक शिष्टमंडळ लवकरच जपानला रवाना होणार होते. या दौऱ्याची सर्व तयारी पूर्ण झाली होती, मात्र बदलत्या जागतिक परिस्थितीमुळे आणि राष्ट्रीय हिताचा विचार करून हा दौरा रद्द करण्याचा निर्णय घेण्यात आला.