West Bengal Election 2026 : निकालाच्या काही तासाआधीच बिधाननगर मतमोजणी केंद्राबाहेर तुफान राडा; TMC-भाजप समर्थक आमनेसामने

पश्चिम बंगालमधील उत्तर २४ परगणा जिल्ह्यातील बिधाननगर येथे रविवारी (३ मे २०२६) मतमोजणी केंद्राबाहेर मोठा गोंधळ उडाल्याची घटना समोर आली. तृणमूल काँग्रेस (TMC) आणि भाजप (BJP) समर्थकांमध्ये जोरदार संघर्ष उसळला, ज्यामुळे परिसरात तणावपूर्ण वातावरण निर्माण झाले.

पोलिसांच्या माहितीनुसार, शनिवारी रात्री स्ट्रॉंग रूमसमोर दोन्ही पक्षांच्या कार्यकर्त्यांमध्ये वाद झाला होता. या वादाचे रूपांतर रविवारी घोषणाबाजी आणि प्रति-घोषणाबाजीमध्ये झाले आणि पाहता पाहता परिस्थिती हाताबाहेर गेली. परिस्थिती नियंत्रणात आणण्यासाठी मोठ्या संख्येने केंद्रीय सुरक्षा दल घटनास्थळी दाखल झाले. पोलिसांनी हस्तक्षेप करत समर्थकांना पांगवले आणि दोन्ही गटांमध्ये बॅरिकेड्स उभारून त्यांना वेगळे केले.

दरम्यान, या घटनेवरून आरोप-प्रत्यारोपांची मालिका सुरू झाली आहे. भाजपने दावा केला की, तृणमूल कार्यकर्त्यांनी त्यांच्या कॅम्पवर पक्षाचे झेंडे लावल्यामुळे वाद पेटला. तर तृणमूल काँग्रेसने उलट आरोप करत केंद्रीय दलांकडून लाठीचार्ज झाल्याचा दावा केला. मात्र, पोलिस आणि केंद्रीय दलांच्या तत्पर हस्तक्षेपामुळे परिस्थिती आणखी चिघळली नाही.

स्ट्रॉंग रूम परिसरात सुरक्षा व्यवस्था अधिक कडक करण्यात आली असून, इतर मतमोजणी केंद्रांबाहेरही कडेकोट बंदोबस्त ठेवण्यात आला आहे. प्रशासनाने आधीच मतमोजणी केंद्रांबाहेर फटाके फोडणे आणि विजय मिरवणुका काढण्यावर बंदी घातली आहे.

दरम्यान, मुख्यमंत्री ममता बॅनर्जी यांनी पक्षाच्या प्रतिनिधींना महत्त्वाच्या सूचना दिल्या आहेत. ज्या ठिकाणी भाजप ५०० ते ७०० मतांनी आघाडीवर आहे, तिथे तात्काळ फेरमतमोजणीची मागणी करण्याचे आदेश त्यांनी दिले. तसेच, प्रतिनिधींनी मतमोजणीपूर्वी जवळच राहावे, जेणेकरून ते वेळेवर केंद्रावर पोहोचू शकतील, असेही त्यांनी सांगितले.