- हिंदुराष्ट्रात हिरव्यांची दादागिरी खपवून घेतली जाणार नाही
मुंबई : ‘सेक्युलर’ (धर्मनिरपेक्ष) हा शब्द मूळ संविधानाचा भाग नसून, ती काँग्रेसने निर्माण केलेली कीड आहे, असा घणाघात राज्याचे मत्स्यव्यवसाय आणि बंदरे विकास मंत्री नितेश राणे (Nitesh Rane) यांनी रविवारी केला. तसेच, भारत हा देश हिंदू राष्ट्र होता, आहे आणि यापुढेही हिंदू राष्ट्रच राहील, असेही ते म्हणाले.
संघर्ष नगर, चांदिवली येथे आयोजित हिंदू संमेलनात ते बोलत होते. यावेळी हिंदू समाजाला संघटित होण्याचे आवाहन करताना राणे म्हणाले, हिंदू समाजाने आपली ताकद ओळखण्याची वेळ आली असून, प्रत्येक आव्हानाला संघटित होऊन उत्तर देणे ही काळाची गरज आहे. या भारत देशात ९० टक्के हिंदू राहतात. त्यामुळे येथे सर्वात आधी हिंदूंचे हित पाहिले जाईल, त्यानंतरच इतरांचा विचार होईल. कोणालाही काहीही टीका करू द्या, आमची भूमिका अगदी स्पष्ट आहे, असे राणे यांनी ठणकावून सांगितले.
स्वराज्याची लढाई हिंदू विरुद्ध मुस्लिम :
"काही लोक असा दावा करतात की, छत्रपती शिवाजी महाराजांनी स्थापन केलेले स्वराज्य हे 'हिंदू विरुद्ध मुसलमान' अशा संघर्षावर आधारित नव्हते. पण, हा दावा करणाऱ्यांना माझा एकच सवाल आहे - जर ही लढाई केवळ राजकीय होती, तर औरंगजेबाने छत्रपती संभाजी महाराजांना हालहाल करून मारताना, 'धर्मांतर करा आणि जीवदान घ्या', अशी अट का घातली होती? या प्रश्नाचे उत्तर त्यांच्याकडे आहे का?", असा सवाल मंत्री नितेश राणे यांनी उपस्थित केला.
