महाराष्ट्रातील सुप्रसिद्ध कीर्तनकार इंदुरीकर महाराज (Indurikar Maharaj) यांच्या मुलीचा साखरपुडा मोठ्या थाटामाटात पार पडला होता. इंदुरीकर महाराजांच्या मुलीच्या साखरपुड्याचे फोटो, व्हिडीओ सोशल मीडियावर मोठ्या प्रमाणावर व्हायरल झाले. यावरुन त्यांच्यावर मोठ्या टीका देखील झाल्या, दुसऱ्यांना साधेपणानं लग्न करण्याचे उपदेश देणारे महाराज आपल्या मुलीचा साखरपुडा सोहळा मात्र चांगला मोठा साजरा करतात असं म्हणत त्यांच्यावरती सोशल मीडियातून व्यक्तीगत टीका झाल्या. या टीकेमुळे इंदुरीकर महाराजांना (Indurikar Maharaj) मोठा मानसिक त्रासाला सामोरं जावं लागल्याचं दिसून आले.
दरम्यान, येत्या 3 मे 2026 रोजी त्यांची मुलगी ज्ञानेश्वरी हिचा साहिल या नवऱ्या मुलासोबत विवाह होणार आहे. या विवाहासाठी तयार करण्यात आलेल्या लग्नपत्रिकेची सध्या सगळीकडेच चर्चा होत आहे. इंदोरीकर महाराज यांनी मुख्यमंत्री देवेंद्र फडणवीस (CM Devendra Fadnavis) यांना देखील मुलीच्या विवाह सोहळ्यास आमंत्रण दिले आहे.
इंदुरीकर महाराज (Indurikar Maharaj) हे राज्यातील प्रसिद्ध कीर्तनकार आहेत. त्यांच्या प्रत्येक कीर्तनाला हजारो लोकांची उपस्थिती असते. महाराष्ट्रभर त्यांचे कीर्तन होत असते. समाजातील ज्वलंत प्रश्नांवर , समस्यांवर ते थेटपणे अगदी मार्मिक पद्धतीने ते कीर्तनात बोलत असतात. लग्नातील अवाढव्य खर्च, बेरोजगारी यांसह अनेक विषयावर ते विनोदीशैलीत पण रोखठोक बोलत असतात.
पण जेव्हा इंदुरीकर महाराज यांच्या मुलीच्या साखरपुडा झाला तेव्हा त्यातील खर्च हा अनेकांच्या भुवया उंचावणारा ठरला. त्यामुळे या साखरपुड्याची साखरपुड्याचीही खूप चर्चा झाली होती. त्यांनी आपल्या लेकीच्या साखरपुड्यासाठी आयोजित केलेला सोहळा, त्यासाठी लागलेला खर्च यावरून वेगवेगळी मतं व्यक्त केली गेली.
दरम्यान, आता इंदुरीकर महाराज यांच्या मुलीच्या विवाहाची लग्नपत्रिका समोर आली आहे. येत्या 3 मे 2026 रोजी इंदुरीकर महाराजांची कन्या ज्ञानेश्वरी देशमुख आणि साहिल चिलाप या नवऱ्या मुलासोबत विवाह होणार आहे. लग्न सायंकाळी 6.50 वाजता होणार आहे. विशेष म्हणजे त्याआधी साडेचार ते साडे सहावाजेदरम्यान कीर्तन आयोजित करण्यात आले आहे.हे कीर्तनपुष्प प.पु.गुरुवर्य ह. भ.प.डॉ. नारायण महाराज जाधव (आळंदी) यांचे कीर्तन होणार आहे. तर विवाहस्थळीच सायंकाळी 4 वाजता प. पु. स्वामी गगणगिरी महाराज यांच्या 8 व्या सप्ताहाचे ध्वजारोहण होईल.
