नवापूर : नवापूर एमआयडीसी (MIDC) परिसरात बिबट्या या संरक्षित वन्यप्राण्याच्या कातडीची तस्करी करणाऱ्या टोळीचा वनविभागाने पर्दाफाश केला आहे. 'वाइल्ड लाइफ क्राइम कंट्रोल ब्युरो' (मुंबई) आणि स्थानिक वनविभागाच्या संयुक्त पथकाने केलेल्या या धडक कारवाईत पाच संशयितांना ताब्यात घेण्यात आले असून, त्यांच्याकडून बिबट्याची कातडी आणि चार वाहने जप्त करण्यात आली आहेत.
गुप्त माहितीच्या आधारे लावला सापळा
मिळालेल्या गोपनीय माहितीनुसार, काही इसम बिबट्याच्या कातडीचे तुकडे विक्रीसाठी नवापूर परिसरात येणार होते. या माहितीची दखल घेत मुंबई येथील 'वाइल्ड लाइफ क्राइम कंट्रोल ब्युरो'चे पथक आणि नंदुरबारचे सहाय्यक वनसंरक्षक यांच्या मार्गदर्शनाखाली एक विशेष पथक तयार करण्यात आले. यामध्ये नंदुरबार, चिंचपाडा आणि नवापूर प्रादेशिक वनविभागाच्या अधिकारी व कर्मचाऱ्यांचा समावेश होता. या पथकाने नवापूर एमआयडीसी परिसरात सापळा रचला. संशयित आरोपी पांढऱ्या रंगाच्या मारुती स्विफ्ट कार (क्रमांक: GJ 26 A 1513) आणि तीन दुचाकींवरून बिबट्याच्या कातडीचे तुकडे घेऊन जात असताना, वनविभागाच्या पथकाने त्यांना अडवून त्यांची झडती घेतली. यावेळी त्यांच्याकडे बिबट्याच्या कातडीचे तुकडे मिळून आले. पथकाने तात्काळ पाचही आरोपींना ताब्यात घेतले असून त्यांच्याकडील कार आणि तीन दुचाकी जप्त केल्या आहेत.
मध्यपूर्वेतील तणावाच्या पार्श्वभूमीवर जवळपास ४८ दिवस इंटरनेट निर्बंध सहन केलेल्या इराण मधील नागरिकांना अखेर अंशतः दिलासा मिळाला आहे. गुगल सर्च (Google ...
पुढील तपास सुरू
ताब्यात घेतलेले आरोपी आणि जप्त केलेला मुद्देमाल नवापूर येथील मध्यवर्ती रोपवाटिकेमध्ये आणण्यात आला आहे. या सर्व आरोपींविरुद्ध 'भारतीय वन्यजीव संरक्षण अधिनियमा' अंतर्गत गुन्हा दाखल करण्यात आला आहे. ही कातडी कोठून आणली आणि याचे जाळे कुठेपर्यंत पसरलेले आहे, याचा सखोल तपास आता वनविभाग करत आहे. या कारवाईमुळे वन्यप्राण्यांची शिकार करणाऱ्या आणि त्यांच्या अवयवांची तस्करी करणाऱ्या रॅकेटमध्ये मोठी खळबळ माजली आहे.
