मुंबई (विशेष प्रतिनिधी) : राजे एडवर्ड स्मारक (केईएम) रुग्णालयात गुणवत्तापूर्ण व अत्याधुनिक स्वरूपाच्या आरोग्य सुविधांसाठी ‘हॉस्पिटल मॅनेजमेंट इन्फॉर्मेशन सिस्टिम’ (एमआयएएस) प्रणालीच्या प्रभावी अंमलबजावणीसाठी सर्व विभागप्रमुखांनी प्रयत्न करावेत. तसेच प्रणाली अंतर्गत उपलब्ध होणाऱ्या माहिती आणि डॅशबोर्डचा नियमितपणे आढावा घ्यावा. रुग्णांसाठी आरोग्य सुविधा सहज आणि तंत्रज्ञानस्नेही स्वरुपात उपलब्ध होतील याची खबरदारी घेण्यात यावी, असे निर्देश महानगरपालिका आयुक्त आश्विनी भिडे यांनी दिले. केंद्र आणि राज्य सरकारच्या योजनांचा फायदा रुग्णांना कमी कालावधीत उपलब्ध करून देण्याच्या अनुषंगाने ‘एच. एम. आय. एस.’ सेवेशी उत्तमरित्या संलग्न करुन देण्यासाठी प्रयत्न करावेत, अशा सूचनाही त्यांनी आजच्या बैठकीदरम्यान दिल्या.
सेठ गोर्धनदास सुंदरदास वैद्यकीय महाविद्यालय व राजे एडवर्ड स्मारक रुग्णालय येथील विविध वैद्यकीय कक्षांच्या ठिकाणी महानगरपालिका आयुक्त आश्विनी भिडे यांनी शुक्रवारी १७ एप्रिल २०२६ रोजी भेट दिली. रुग्णालय पुनर्विकास, विविध आरोग्य योजनांची अंमलबजावणी, प्राथमिक आरोग्य सुविधांवर येणारा ताण कमी करणे यासारख्या विषयांच्या अनुषंगाने आजच्या बैठकीत आढावा घेण्यात आला. याप्रसंगी उपायुक्त (सार्वजनिक आरोग्य) शरद उघडे, केईएम रुग्णालयाच्या अधिष्ठाता डॉ. संगीता रावत, रुग्णालयातील विविध विभागांचे प्रमुख आदी उपस्थित होते. केईएम रूग्णालयातील नोंदणी कक्ष, अतिदक्षता विभाग, पुरूष सर्वसाधारण कक्ष, अपघात विभाग याठिकाणी महानगरपालिका आयुक्त आश्विनी भिडे यांनी स्थळभेट दिली. तसेच रुग्णालयातील विविध विभागांचे सुरू असलेले प्रकल्प, विविध वैद्यकीय सुविधांच्या अनुषंगाने पायाभूत सुविधा विकास, रुग्णालयातील नवीन इमारतींचा विकास, रुग्णशय्या संख्यावाढ आणि विविध विभागअंतर्गत वैद्यकीय सुविधांच्या क्षमतावाढीच्या अनुषंगाने सुरू असलेल्या प्रगतीचा आढावा घेतला.
रुग्णांच्या नोंदणी कक्षाच्या ठिकाणी ‘एच. एम. आय. एस.’ प्रणालीची कार्यपद्धती महानगरपालिका आयुक्त आश्विनी भिडे यांनी जाणून घेतली. तसेच वैद्यकीय तपासण्या, रुग्णांची माहिती, वैद्यकीय अहवाल यासारखा तपशील ‘एच. एम. आय. एस.’ प्रणालीमध्ये कशा पद्धतीने संलग्न करण्यात आला आहे, या बाबीचा आढावाही आयुक्त भिडे यांनी घेतला. त्यानंतर पुरूष रुग्ण कक्षाच्या ठिकाणी भेट देऊन रूग्ण नोंदणी, रुग्णालयातील कक्षात देण्यात येणारे उपचार, वैद्यकीय अहवाल, रूग्णांचा तपशील आदी बाबींची ‘एच. एम. आय. एस.’ प्रणाली अंतर्गत होणारी नोंद याचाही तपशील आयुक्त भिडे यांनी जाणून घेतला. अपघात विभाग, अतिदक्षता विभाग याठिकाणी देण्यात येणाऱ्या सुविधांबाबतची माहिती त्यांनी या भेटीदरम्यान घेतली. सद्यस्थितीला एचएमआयएस प्रणालीच्या अंमलबजावणीअंतर्गत येणारी आव्हानांवर मात करून ही यंत्रणा अधिकाधिक प्रभावी होण्याच्या अनुषंगाने रुग्णालय प्रशासनाने अधिक प्रयत्न करावेत. एचआयएमएस प्रणालीअंतर्गत रुग्णाभिमुख सेवा उपलब्ध करून देण्यावर अधिक भर द्यावा, असेही निर्देश त्यांनी याप्रसंगी दिले.