चार वरिष्ठ सनदी अधिकाऱ्यांच्या बदल्या; जितेंद्र पापळकर यांची जीएसटी विभागात नियुक्ती
मुंबई : राज्य शासनाने गुरुवारी प्रशासकीय स्तरावर महत्त्वाचे फेरबदल करताना चार वरिष्ठ सनदी अधिकाऱ्यांच्या बदल्यांचे आदेश जारी केले आहेत. यामध्ये छत्रपती संभाजीनगरच्या विभागीय आयुक्तपदी जी. श्रीकांत यांची नियुक्ती करण्यात आली असून, मागील काही काळापासून या पदाची जबाबदारी सांभाळणारे जितेंद्र पापळकर यांची मुंबईत जीएसटी विभागात बदली करण्यात आली आहे.
सामान्य प्रशासन विभागाने गुरुवारी सायंकाळी उशिरा या बदल्यांचे आदेश काढले. २००९ च्या तुकडीचे भारतीय प्रशासकीय सेवेतील अधिकारी जी. श्रीकांत हे नवी मुंबई येथे जलजीवन मिशनचे अभियान संचालक म्हणून कार्यरत होते. छत्रपती संभाजीनगरच्या विभागीय आयुक्तपदाचा कार्यभार आता त्यांच्याकडे सोपवण्यात आला आहे. तर, २०१० च्या तुकडीचे अधिकारी जितेंद्र पापळकर यांची छत्रपती संभाजीनगरहून बदली करण्यात आली असून, त्यांची नियुक्ती मुंबईत वस्तू व सेवा कर विभागाच्या संयुक्त आयुक्तपदी करण्यात आली आहे. याच बदल्यांच्या साखळीत २०१३ च्या तुकडीचे अधिकारी गंगाथरण डी. यांची जलजीवन मिशनच्या (नवी मुंबई) अभियान संचालकपदी वर्णी लागली आहे. तसेच, छत्रपती संभाजीनगर येथील सिडकोचे (नवीन शहर) मुख्य प्रशासक म्हणून कार्यरत असलेले जगदीश मिनियार (२०१५ तुकडी) यांची पुण्यात बदली करण्यात आली आहे. त्यांच्याकडे पुणे येथील महिला व बालविकास विभागाच्या आयुक्तपदाची जबाबदारी सोपवण्यात आली आहे.