Gold and silver prices : इराण-अमेरिका तणाव वाढला; सोन्या-चांदीच्या दरात मोठी चढ-उतार

मुंबई : पाकिस्तानच्या इस्लामाबाद (Islamabad) येथे झालेली इराण (Iran) आणि अमेरिका (America) यांच्यातील शांतता चर्चा निष्फळ ठरल्याने जागतिक तणाव पुन्हा वाढला आहे. अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी होर्मुज सामुद्रधुनीच्या नाकाबंदीचे आदेश दिल्याची चर्चा असून, इराणविरोधात आक्रमक भूमिका घेण्याची शक्यता व्यक्त केली जात आहे. या घडामोडींचा परिणाम आता आर्थिक क्षेत्रावरही दिसून येत आहे.

सोन्याच्या दरात घसरण :

आठवड्याच्या सुरुवातीलाच भारतात सोन्याच्या दरात घसरण झाली आहे. नवी दिल्ली (New Delhi) येथे २४ कॅरेट सोन्याचा दर प्रति १० ग्रॅम १,५२,९८० रुपये असून, मुंबईमध्ये (Mumbai) तो १,५२,८३० रुपये आहे. मात्र गेल्या आठवड्यात सोन्याच्या किमतीत मोठी वाढ झाली होती.

चेन्नई (Chennai) येथे सोनं सर्वाधिक महाग असून २४ कॅरेटसाठी १,५४,१०० रुपये दर आहे. पुणे आणि बंगळुरू येथे दर मुंबईसारखाच आहे. आंतरराष्ट्रीय बाजारात स्पॉट गोल्डचा भाव प्रति औंस४,७७७.१७ डॉलर्सवर पोहोचला आहे.

चांदीच्या किमतीतही घसरण :

दरम्यान, चांदीच्या किमतीतही घसरण झाली असून प्रति किलो दर २,५९,९०० रुपयांवर आला आहे. आंतरराष्ट्रीय बाजारात चांदीचा दर प्रति औंस ७५.९१ डॉलर्स आहे. गेल्या काही महिन्यांत मोठी वाढ झाल्यानंतर सध्या सोन्या-चांदीच्या दरात सतत चढ-उतार सुरू आहेत.