चेन्नईच्या एम. ए. चिदंबरम स्टेडियमवर खेळल्या गेलेल्या आयपीएल २०२६ मधील १८व्या सामन्यात चेन्नई सुपर किंग्सने अखेर विजयाचा दुष्काळ संपवला. सलग तीन पराभवांनंतर सावरत, ऋतुराज गायकवाडच्या नेतृत्वाखाली सीएसकेने दिल्ली कॅपिटल्सचा २३ धावांनी पराभव करत स्पर्धेत दमदार पुनरागमन केलं. या विजयाचा खरा हिरो ठरला तो म्हणजे यष्टीरक्षक फलंदाज संजू सॅमसन, ज्याने आपल्या वादळी फलंदाजीने दिल्लीच्या गोलंदाजांची अक्षरशः धुलाई केली.
याआधी सीएसकेला आरसीबी, पंजाब किंग्स आणि राजस्थान रॉयल्सकडून पराभवाचा सामना करावा लागला होता. मात्र या सामन्यात त्यांनी २० षटकांत २ गडी गमावत तब्बल २१२ धावांचा डोंगर उभा केला. प्रत्युत्तरात दिल्ली कॅपिटल्सला १८९ धावांपर्यंतच मजल मारता आली. ट्रिस्टन स्टब्सने ६० धावांची झुंजार खेळी केली, पण ती अपुरी ठरली. या विजयासह सीएसकेने गुणतालिकेत १०व्या स्थानावरून ९व्या स्थानावर झेप घेत दोन गुणांची कमाई केली.
२१३ धावांच्या आव्हानाचा पाठलाग करताना दिल्लीने दमदार सुरुवात केली. पाथुम निसांकाने २४ चेंडूत ४१ धावा केल्या, तर के.एल. राहुलने १८ धावांचे योगदान दिले. मात्र मधल्या फळीतील अपयशामुळे दिल्लीचा डाव कोसळला. अक्षर पटेल आणि समीर रिझवी स्वस्तात बाद झाले, तर आशुतोष शर्माने १९ धावांची छोटी पण आक्रमक खेळी केली. तरीही दिल्लीला विजय मिळवता आला नाही.
या पराभवासह दिल्ली कॅपिटल्सचा चार सामन्यांतील हा दुसरा पराभव ठरला, तर चेन्नईने अखेर विजयाची चव चाखत स्पर्धेत जोरदार कमबॅक केलं.