नाशिक : बाजारात सुमारे १०० रुपये किलो दराने मिळणाऱ्या चिंचोक्यांपासून आकर्षक खडे तयार करून ते ‘मंत्रबद्ध’ असल्याचे भासवून भोंदू अशोक खरात भाविकांना लाखो रुपयांना विक्री करत होता. यात खरातला मदत करणारा नाशिकरोड येथील व्यावसायिक आता रडारवर आला असून, त्याची एसआयटी कडून चौकशी होणार असल्याचे समजते. दरम्यान खरातची पोलिस कोठडी संपल्याने सोमवारी (दिनांक १३) न्यायालयात ऑनलाईन सुनावणी होणार असल्याचे समजते.
महिलांवरील लैंगिक अत्याचारांसह कोट्यवधींची संपत्ती उभी करणाऱ्या भोंदू अशोक खरात याचे नवनवीन कारनामे एसआयटीच्या तपासातून समोर येत आहेत.. नाशिकरोड परिसरातील या व्यावसायिकाकडे खरात चिंचोके देत असे. त्यापासून महागडे आणि आकर्षक दिसणारे खडे तयार करून देत असे. त्यानंतर खरात हे खडे आपल्या संपर्कातील भाविकांना त्यांच्या आर्थिक स्थितीनुसार हजारो ते लाखो रुपये वेगवेगळ्या किमतीत विकत असे.
खरातने उत्तर सोलापूर तालुक्यातील कळमण शिवारात ११ एकर जमीन खरेदी केल्याची माहितीही तपासातून पुढे आली आहे. ही जमीन प्रस्तावित शक्तीपीठ महामार्गासाठी संपादनात येण्याची शक्यता होती. अधिक मोबदला मिळावा यासाठी त्या जमिनीत आंबा आणि डाळिंबाची लागवड केल्याचेही उघड झाले आहे. प्रस्तावित शक्तीपीठ महामार्ग सोलापूर जिल्ह्यातील सांगोला, पंढरपूर, मोहोळ, उत्तर सोलापूर आणि बार्शी तालुक्यांतून जाणार असल्याची माहिती मिळाल्यानंतर, वरिष्ठ अधिकाऱ्यांशी संगनमत करून महामार्गाच्या रेखांकनाची माहिती खरातने मिळवली असल्याचा संशय व्यक्त केला जात आहे.
कल्पना खरातचा चौफेर शोध सुरूच : अशोक खरातने रणजित ब्रह्मचारी कोल्हाळ यांच्या मालकीची ११ एकर जमीन २८ मार्च २०२४ रोजी स्वतःच्या तसेच पत्नी कल्पना खरात यांच्या नावे खरेदी केल्याची नोंद कळमण येथील महसुली दप्तरी असल्याचे समजते. दुसरीकडे कल्पना खरात अद्याप गायब असून, पोलिसांकडून चौफेर शोध सुरू आहे.