Emergency Flight Landing : दुबईहून येणाऱ्या फ्लाइटचे लखनौमध्ये इमर्जन्सी लँडिंग; १५४ प्रवासी सुरक्षित

लखनौ येथे आज म्हणजेच शनिवार ११ एप्रिल सकाळी दुबईहून काठमांडूकडे जाणाऱ्या फ्लाय दुबईच्या फ्लाइटचे (एफजेड-1133) इमर्जन्सी लँडिंग करण्यात आले. काठमांडूमध्ये खराब हवामानामुळे लँडिंगची परवानगी मिळाली नाही, त्यामुळे वैमानिकाने तातडीने लखनौ एअर ट्रॅफिक कंट्रोलशी संपर्क साधून विमान उतरवण्याची विनंती केली. परवानगी मिळताच सकाळी ८:२२ वाजता अमौसी विमानतळावर विमान सुरक्षितपणे उतरवण्यात आले. या फ्लाइटमध्ये एकूण १५४ प्रवासी होते आणि सर्व प्रवासी सुरक्षित असल्याची माहिती अधिकाऱ्यांनी दिली.

लँडिंगनंतर तांत्रिक पथकाने विमानाची सखोल तपासणी केली. कोणतीही मोठी तांत्रिक अडचण आढळली नाही. त्यानंतर विमानात इंधन भरून सुमारे दीड तासानंतर सकाळी १० वाजता फ्लाइट पुन्हा काठमांडूकडे रवाना करण्यात आले. या संपूर्ण घटनेदरम्यान प्रवाशांमध्ये काही काळ तणावाचे वातावरण निर्माण झाले होते, मात्र प्रशासनाच्या तत्परतेमुळे परिस्थिती नियंत्रणात राहिली.

फ्लाय दुबई ही कंपनी २००८ साली दुबई सरकारच्या सहकार्याने सुरू करण्यात आली असून तिचे मुख्यालय दुबई आंतरराष्ट्रीय विमानतळावर आहे. ही एअरलाइन मध्य पूर्व, आशिया, युरोप आणि आफ्रिका खंडातील अनेक शहरांसाठी सेवा पुरवते. भारतातील अनेक शहरांमधूनही या कंपनीच्या थेट फ्लाइट्स उपलब्ध आहेत आणि तुलनेने किफायतशीर तिकिटांसाठी ती ओळखली जाते.

दरम्यान, यापूर्वीही ३१ मार्च रोजी लखनौमध्ये आणखी एक इमर्जन्सी लँडिंगची घटना घडली होती. एअर इंडिया एक्सप्रेसच्या फ्लाइटमध्ये वैमानिकाच्या केबिनमध्ये धूर जाणवल्यामुळे मेडे कॉल देण्यात आला होता. त्यानंतर प्रवाशांना ऑक्सिजन मास्क देण्यात आले आणि सायंकाळी ५:१७ वाजता विमान सुरक्षितपणे लखनौमध्ये उतरवण्यात आले होते. सलग अशा घटनांमुळे विमान सुरक्षेबाबतची सतर्कता आणि तातडीची यंत्रणा किती महत्त्वाची आहे, हे पुन्हा एकदा अधोरेखित झाले आहे.