नवी दिल्ली: इराणच्या केंद्रीय लष्करी कमांडने अमेरिकेचे अध्यक्ष डोनाल्ड ट्रम्प यांच्या ४८ तासांच्या आत करार करण्याच्या धमकीला फेटाळून लावले आहे. इराणने केवळ ट्रम्प यांच्या धमक्यांकडे दुर्लक्ष केले नाही, तर अमेरिकेला गंभीर परिणामांचा इशाराही दिला आहे. इराणने याला एक मूर्खपणाचे पाऊल म्हटले असून, यामुळे अमेरिकेसाठी नरकाचे दरवाजे उघडले जातील, असेही म्हटले आहे. ट्रम्प यांनी धमकी दिली होती की, जर इराणने ४८ तासांच्या आत शांतता करार स्वीकारला नाही, तर ते देशाची महत्त्वपूर्ण पायाभूत सुविधा नष्ट करतील.
खतम अल-अंबिया केंद्रीय मुख्यालयातून जारी केलेल्या निवेदनात इराणी लष्करी जनरल अली अब्दुल्लाही अलीआबादी म्हणाले की, ट्रम्प यांची धमकी एक असहाय्य, घाबरलेले, असंतुलित आणि मूर्खपणाचे कृत्य आहे. त्यांनी इशारा दिला की, "या संदेशाचा साधा अर्थ असा आहे की तुमच्यासाठी नरकाचे दरवाजे उघडले जातील."
नुकतच, अमेरिकेचे राष्ट्राध्यक्ष ट्रम्प यांनी त्यांच्या 'ट्रुथ सोशल' या सोशल मीडिया प्लॅटफॉर्मवर एका धमकीवजा पोस्टमध्ये इराणला इशारा दिला असून, होर्मुझची सामुद्रधुनी उघडण्यासाठी ४८ तासांची मुदत दिली आहे. ट्रम्प यांनी इराणला इशारा दिला की, "आठवतंय का, जेव्हा मी इराणला करार करण्यासाठी किंवा होर्मुझची सामुद्रधुनी उघडण्यासाठी १० दिवसांची मुदत दिली होती? वेळ निघून जात आहे. फक्त ४८ तास शिल्लक आहेत. त्यांच्यावर प्रलय कोसळण्यापूर्वी, देव त्यांचे भले करो."