हिमाचल प्रदेशातील पर्यटनस्थळ असलेल्या अटल टनल रोहतांगच्या टोकाजवळ हिमखंड कोसळल्याची घटना घडली आहे. दोन दिवसांच्या हिमवृष्टीनंतर रविवारी (५ एप्रिल) ऊन पडताच दुपारच्या सुमारास अटल टनलच्या उत्तर पोर्टलजवळ पीर पंजाल पर्वतरांगांमध्ये हिमस्खलन झाले. हिमस्खलनाचा वेग इतका प्रचंड होता की हवेत उडणारे बर्फाचे तुकडे पर्यटकांपर्यंत पोहोचले.
दोन दिवसांपूर्वीच सीमा सडक संघटना (बीआरओ) यांच्या शिफारसीनुसार लाहौल-स्पीती प्रशासनाने अटल टनलच्या उत्तर पोर्टललगतच्या परिसरात पर्यटन उपक्रमांवर बंदी घातली होती. तसेच हिमखंड कोसळण्याचा इशाराही आधीच देण्यात आला होता. एप्रिल २०२६ च्या सुरुवातीला लाहौल-स्पीती तसेच मनाली परिसरातील पर्यटनस्थळांवर झालेल्या अवेळी हिमवृष्टी आणि बदलत्या हवामानामुळे लाहौल व मनाली खोऱ्यात हिमस्खलनाचा धोका वाढला आहे. प्रशासनाच्या माहितीनुसार, सतत सुरू असलेल्या हिमवृष्टीमुळे मनाली–केलंग मार्गावर हिमस्खलनाचा धोका अधिक वाढला आहे.