टिझर इमेजचा उजळलेला व्हर्जन पाहिल्यास नव्या टायगुनमध्ये अधिक शार्प आणि पत्तीच्या आकाराचे हेडलॅम्प दिसून येतात. हे डिझाइन कंपनीच्या ग्लोबल एसयूव्ही मॉडेल्सप्रमाणेच असल्याचे जाणवते. पुढील बंपरमध्येही बदल करण्यात आले असून तो अधिक स्पोर्टी आणि आकर्षक दिसतो. साइड प्रोफाइलमध्ये नवीन डिझाइनचे अलॉय व्हील देण्यात आले आहेत, ज्यामुळे कारला अधिक प्रीमियम लुक मिळतो. मागील बाजूस टेललॅम्पमध्ये नवीन एलईडी लाइट गाईड डिझाइन देण्यात आले असून कनेक्टेड लाइटिंगचा ट्रेंड कायम ठेवण्यात आला आहे. रिअर बंपरचाही डिझाइन अपडेट करण्यात येणार आहे.
इंटरनेटवर समोर आलेल्या काही लीक इमेजमधून असे दिसते की या अपडेटेड एसयूव्हीचा फ्रंट-एंड डिझाइन कंपनीच्या जागतिक मॉडेल्सशी सुसंगत असेल. हेडलॅम्प्सदरम्यान एक स्लिम ग्रिल देण्यात येईल, तसेच ग्रिलच्या वरच्या भागावर एलईडी लाइटबार आणि मध्यभागी इल्यूमिनेटेड व्हीडब्ल्यू लोगो असण्याची शक्यता व्यक्त केली जात आहे. यामुळे कारचा लुक अधिक मॉडर्न आणि टेक-फ्रेंडली होणार आहे.
कारच्या इंटेरियरमध्येही मोठे बदल अपेक्षित आहेत. फेसलिफ्टेड स्कोडा कुशाक प्रमाणेच टायगुनमध्ये १०.२५ इंच डिजिटल इन्स्ट्रुमेंट क्लस्टर, अपडेटेड टचस्क्रीन सिस्टम, पॅनोरमिक सनरूफ आणि मागील सीटसाठी मसाज फंक्शनसारखे प्रीमियम फीचर्स मिळण्याची शक्यता आहे. त्यामुळे ही एसयूव्ही केवळ लुक्समध्येच नव्हे तर कम्फर्ट आणि टेक्नॉलॉजीमध्येही एक पाऊल पुढे जाणार आहे.
इंजिनच्या बाबतीत मात्र कंपनी मोठे बदल करण्याची शक्यता कमी आहे. या फेसलिफ्टमध्ये १.० लिटर टीएसआय पेट्रोल आणि १.५ लिटर टीएसआय पेट्रोल इंजिन ऑप्शन कायम ठेवले जातील. मात्र १.० लिटर इंजिनसाठी सध्या मिळणाऱ्या ६-स्पीड ऑटोमॅटिकच्या जागी नवीन ८-स्पीड टॉर्क कन्व्हर्टर ऑटोमॅटिक गिअरबॉक्स देण्यात येऊ शकतो. स्टँडर्ड ६-स्पीड मॅन्युअल गिअरबॉक्स कायम राहील, तर १.५ लिटर इंजिनसोबत डीएसजी गिअरबॉक्सच मिळण्याची अपेक्षा आहे.
एकूणच, व्होल्क्सवॅगन टायगुन फेसलिफ्टमध्ये डिझाइन, फीचर्स आणि टेक्नॉलॉजीमध्ये महत्त्वाचे अपडेट्स देऊन कंपनी भारतीय ग्राहकांना अधिक प्रीमियम अनुभव देण्याच्या तयारीत आहे. ९ एप्रिलला लॉन्चनंतर या एसयूव्हीची किंमत आणि पूर्ण स्पेसिफिकेशन स्पष्ट होणार असून बाजारात तिची स्पर्धा आणखी तीव्र होण्याची शक्यता आहे.