मुंबई : राज्याच्या प्रशासनात वरिष्ठ स्तरावर मंगळवारी मोठे फेरबदल करण्यात आले असून, १० सनदी अधिकाऱ्यांच्या बदल्यांचे आदेश जारी करण्यात आले आहेत. मुख्यमंत्री कार्यालयातील अतिरिक्त मुख्य सचिव अश्विनी भिडे यांची मुंबई महानगरपालिका आयुक्तपदी नियुक्ती करण्यात आली आहे. विशेष म्हणजे, पालिकेची धुरा सांभाळतानाच मुंबई मेट्रो रेल महामंडळाच्या व्यवस्थापकीय संचालक पदाचा अतिरिक्त कार्यभारही त्यांच्याकडेच कायम ठेवण्यात आला आहे. मावळते मुंबई पालिका आयुक्त भूषण गगराणी यांच्याकडून अश्विनी भिडे यांनी पदभार स्वीकारला. भिडे यांच्या बदलीनंतर रिक्त झालेल्या मुख्यमंत्री कार्यालयातील अतिरिक्त मुख्य सचिवपदी 'महावितरण'चे अध्यक्ष व व्यवस्थापकीय संचालक लोकेश चंद्रा यांची नियुक्ती करण्यात आली आहे. दुसरीकडे, आपल्या शिस्तबद्ध आणि धडक कारवाईसाठी प्रसिद्ध असलेले आयएएस अधिकारी तुकाराम मुंढे यांची पुन्हा एकदा बदली करण्यात आली आहे. दिव्यांग कल्याण विभागात कार्यरत असताना त्यांनी बोगस दिव्यांग प्रमाणपत्रे मिळवणाऱ्या शेकडो कर्मचाऱ्यांवर निलंबनाची कारवाई सुरू केली होती. ही कारवाई सुरू असतानाच आता त्यांची बदली आपत्ती व्यवस्थापन, पुनर्वसन व मदत कार्य विभागाच्या सचिवपदी करण्यात आली आहे. मुंढे यांच्या २० वर्षांच्या कारकिर्दीतील ही २२ वी बदली ठरली आहे.
प्रशासकीय कामाचा अनुभव असलेल्या विकास चंद्र रस्तोगी यांची वित्त विभागाच्या (वित्तीय सुधारणा) अतिरिक्त मुख्य सचिवपदी वर्णी लागली आहे. तर, आपत्ती व्यवस्थापन विभागाच्या प्रधान सचिव विनिता वेद सिंगल यांची मृद आणि जलसंधारण विभागात बदली करण्यात आली आहे. परिमल सिंग हे कृषी आणि अन्न व औषध प्रशासन विभागाचे सचिव म्हणून कार्यभार सांभाळतील. प्रेरणा देशभ्रतार यांची नियुक्ती मत्स्यव्यवसाय विभागाच्या आयुक्त पदी करण्यात आली आहे. तर, वसई-विरार महानगरपालिकेच्या आयुक्तपदी पृथ्वीराज बी. पी. यांची निवड करण्यात आली आह. तुकाराम मुंढे यांच्या जागी माणिक गुरसळ हेदिव्यांग कल्याण विभाग कारभार पाहतील. शिवशाही पुनर्वसन प्रकल्पाची जबाबदारी लहू माळी यांच्याकडे देण्यात आली आहे.