पाकिस्तान सुपर लीग (Pakistan Super League 2026) पुन्हा एकदा वादाच्या भोवऱ्यात सापडली आहे. यावेळी लाहोर कलंदर्स (Lahore Qalandars) संघातील कर्णधार शाहीन आफ्रिदी (Shaheen Shah Afridi) आणि अष्टपैलू खेळाडू सिकंदर रझा (Sikandar Raza) यांच्यावर गंभीर गैरवर्तनाचे आरोप करण्यात आले आहेत.
अनधिकृत व्यक्तींना प्रवेश :
पंजाब पोलिसांच्या माहितीनुसार, या दोन्ही खेळाडूंनी सुरक्षा नियमांचे उल्लंघन करत चार अनधिकृत व्यक्तींना खेळाडूंच्या हॉटेलच्या मजल्यावर प्रवेश दिला. इतकेच नव्हे, तर त्या व्यक्तींना कथितरित्या त्यांच्या खोल्यांमध्ये नेण्यात आले आणि ते जवळपास तीन तास तिथेच थांबले.
प्रोटोकॉलचे उल्लंघन :
या घटनेमुळे हॉटेलमधील खेळाडू आणि सपोर्ट स्टाफच्या सुरक्षेवर प्रश्नचिन्ह निर्माण झाले. लीगचे सीईओ सलमान नसीर यांना पाठवलेल्या पत्रात पोलिसांनी स्पष्ट केले की, संबंधित पाहुण्यांना प्रवेशासाठी परवानगी नव्हती. संघाच्या संपर्क अधिकाऱ्याची विनंतीही दोन वेळा नाकारण्यात आली होती. मात्र, सुरक्षा कर्मचाऱ्यांचा विरोध असूनही पाहुण्यांना आत नेण्यात आले. सुरक्षा यंत्रणांनी या प्रकाराला “प्रोटोकॉलचे स्पष्ट उल्लंघन” असे संबोधले असून, लीग आयोजकांनी या प्रकरणाची चौकशी करून कठोर कारवाई करावी, अशी मागणी केली आहे.
दरम्यान, सिकंदर रझा (Sikandar Raza) याने स्पष्टीकरण देताना सांगितले की, हॉटेलमध्ये आलेले पाहुणे त्यांचे कुटुंबीय आणि जवळचे मित्र होते. त्यांनी शाहीन आफ्रिदी यांना निर्दोष ठरवत संपूर्ण जबाबदारी स्वतःवर घेतली आहे.
या वादाच्या पार्श्वभूमीवर पाकिस्तान क्रिकेट बोर्डाने आधीच कडक भूमिका घेतली आहे. पश्चिम आशियातील तणाव आणि ऊर्जा बचतीच्या कारणामुळे लीगमधील काही सामने प्रेक्षकांविना खेळवले जात आहेत. तसेच खेळाडूंच्या सुरक्षेसाठी हॉटेल आणि मैदान परिसरात कडक पोलीस बंदोबस्त ठेवण्यात आला आहे.
आता या प्रकरणात पुढे काय कारवाई होणार, की हा वाद सामोपचाराने मिटणार, याकडे सर्वांचे लक्ष लागले आहे.