मुंबई : मुंबईमध्ये स्वतःचे घर घेण्याचे स्वप्न पाहणाऱ्यांसाठी मोठी संधी उपलब्ध होणार आहे. म्हाडाच्या मुंबईत मंडळामार्फत या आठवड्यात सुमारे २५०० घरांसाठी सोडतीची जाहिरात काढण्याची शक्यता आहे. या सोडतीत मुंबईतील विविध भागांतील घरे उपलब्ध होणार असून, अनेकजण या लॉटरीची आतुरतेने वाट पाहत आहेत. या लॉटरीमध्ये विक्रोळी, पहाडी गोरेगाव, पवई, जुहू, ताडदेव, बोरिवली आणि पंतनगर या भागांचा समावेश आहे. विशेष म्हणजे विक्रोळीतील कन्नमवार नगर येथे सुमारे १२०० घरे उपलब्ध होणार आहेत, यामुळे या भागाकडे अधिक लक्ष लागले आहे.
यंदाच्या लॉटरीतील घरे थोडी महागडी ठरण्याची शक्यता आहे. घरांच्या किंमती अंदाजे ३२ लाख रुपयांपासून सुरू होऊन तब्बल ८ कोटी रुपयांपर्यंत जाणार आहेत. पहाडी गोरेगावमधील प्रधानमंत्री आवास योजनेअंतर्गत काही घरे सुमारे ३२ लाख रुपयांत मिळणार आहेत, मात्र इतर बहुतांश घरे कोटींच्या घरात असल्याने सर्वसामान्यांसाठी ती परवडणारी नसल्याची चर्चा आहे. ३१ मार्च रोजी लॉटरीची अधिकृत जाहिरात प्रसिद्ध होण्याची शक्यता आहे. त्यानंतर ऑनलाइन अर्ज प्रक्रिया सुरू होईल. अर्जदारांनी वेळेत अर्ज सादर करणे आवश्यक आहे, कारण संगणकीय पद्धतीने पारदर्शक सोडत काढली जाते.
अर्ज करण्यासाठी काही अटीही ठरवण्यात आल्या आहेत. अर्जदाराचे वय किमान १८ वर्षे असणे आवश्यक आहे. विवाहित असल्यास पती-पत्नीचे आधार आणि पॅन कार्ड आवश्यक आहे, तर अविवाहित व्यक्तींनी स्वतःची कागदपत्रे सादर करावी लागतील. याशिवाय अर्जदाराने महाराष्ट्रात किमान १५ वर्षे वास्तव्य केल्याचा अधिवास प्रमाणपत्र (डोमिसाईल) असणे बंधनकारक आहे. या लॉटरीत मुख्यतः मध्यम आणि उच्च उत्पन्न गटासाठी जास्त घरे असणार आहेत. त्यामुळे कमी उत्पन्न गटातील नागरिकांमध्ये काही प्रमाणात नाराजीही व्यक्त होत आहे. तरीही, मुंबईसारख्या महागड्या शहरात स्वतःचे घर मिळवण्याची ही एक मोठी संधी मानली जात आहे. यापूर्वी २०२४ मध्ये म्हाडाने सुमारे २००० घरांसाठी लॉटरी काढली होती, ज्यात घरांच्या किंमती २९ लाख ते ६.८२ कोटी रुपयांदरम्यान होत्या. २०२५ मध्ये लॉटरी न झाल्याने यंदाच्या सोडतीकडे विशेष लक्ष लागले आहे. मुंबईत घर खरेदी करू इच्छिणाऱ्यांसाठी ही लॉटरी महत्त्वाची ठरणार असून, इच्छुकांनी आवश्यक कागदपत्रे तयार ठेवून वेळेत अर्ज करणे गरजेचे आहे.