मुंबई : नगर पथविक्रेत्यांची (फेरीवाला) शिखर समिती आणि परिमंडळीय समिती निवडणुकीबाबतचा पेच अखेर सुटला आहे. उच्च न्यायालयाच्या निर्देशानुसार, या निवडणुकीची मतमोजणी उद्या, शनिवार २८ मार्च २०२६ रोजी पार पडणार असून त्याच दिवशी निकाल जाहीर करण्यात येणार आहेत. न्यायालयाच्या निर्देशानुसार शुक्रवारी झालेल्या गटनेत्यांच्या सभेत चर्चा झाल्यानंतर महापौरांनी दिलेल्या आदेशानंतर प्रशासनाने याबाबतची कार्यवाही केली आहे
मुंबईतील नगर पथविक्रेत्यांची एक शिखर समिती आणि सात परिमंडळाच्या प्रत्येकी एक याप्रमाणे (सात समित्या) एकूण आठ समित्यांच्या निवडणुकीसाठी २९ ऑगस्ट २०२४ रोजी शांततेत आणि सुरळीतपणे मतदान पार पडले. त्यात सरासरी ४९.४६ टक्के मतदान झाले होते. न्यायालयात दाखल विविध याचिकांमुळे, सर्वोच्च न्यायालयाने दिलेल्या निर्देशांनुसार, मतदान प्रक्रिया राबवून मतमोजणी आणि निकाल राखून ठेवण्यात आले होते. दरम्यान, सर्व मतपेट्या स्ट्राँग रुममध्ये सुरक्षित ठेवण्यात आल्या होत्या. परिणामी, मागील दीड वर्ष मतपेट्या मोहोरबंद अवस्थेत होत्या.
सोमवार, २३ मार्च २०२६ रोजी मुंबई उच्च न्यायालयाने (याचिका क्रमांक २९३३९/२०२४ व इतर) या प्रकरणावर अंतिम निकाल दिला. माननीय न्यायालयाने सन २०२४ मध्ये पार पडलेली निवडणूक प्रक्रिया 'विधिग्राह्य' ठरवत, मतमोजणीवरील स्थगिती उठवली आहे. तसेच, विनाविलंब निकाल जाहीर करण्याचे निर्देश प्रशासनाला दिले. त्यानुसार आता मतमोजणी प्रक्रिया तातडीने करण्यात येणार आहे.या निवडणुकीशी संबंधित सर्व उमेदवार, त्यांचे प्रतिनिधी, याचिकाकर्ते, संबंधित संघटना आणि इतर भागधारकांनी या प्रक्रियेसाठी उपस्थित राहावे, असे आवाहन प्रशासनातर्फे करण्यात येत आहे.
दरम्यान, नगर पथविक्रेता समिती निवडणूक निकालाबाबत न्यायालयाने दिलेल्या निर्देशानुसार महापालिका प्रशासनाच्यावतीने तत्काळ निकाल जाहीर करण्याबाबतच महापौरांच्या अध्यक्षतेखाली गटनेत्यांच्या सभेत चर्चा करण्यात आली होती. यामध्ये नगर पथविक्रेता समितीमध्ये नगसेवकांना सदस्य म्हणून घेण्याची मागणी गटनेत्यांनी केली असून त्याबरोबरच या सभेमध्ये फेरीवाला समितीच्या निवडणुकीचा निकालासोबतच ९९,४३५ अर्जदारांच्या पात्रतेबाबतही चर्चा करून यावर त्वरीत निर्णय घेण्यासाठी महापौर रितू तावडे यांनी प्रशासनाकडे अभिप्रायसाठी प्रस्ताव पाठवला होता.
मतमोजणीसाठी खालीलप्रमाणे नियोजन केले आहे:
मतमोजणी दिनांक: शनिवार, २८ मार्च २०२६
मतमोजणी वेळ: दुपारी १२.०० वाजता
मतमोजणी स्थळ: महानगरपालिका समिती सभागृह क्रमांक १ व २, बृहन्मुंबई महानगरपालिका मुख्यालय, महापालिका मार्ग, मुंबई - ४०० ००१.