मुंबई : भारतीय रिअल इस्टेट क्षेत्रात मुंबई महानगर क्षेत्राने अर्थात MMR ने २०२५ या वर्षात ऐतिहासिक कामगिरी नोंदवली आहे. प्रीमियम आणि मध्यम उत्पन्न गटातील घरांच्या वाढत्या मागणीमुळे एमएमआर हे देशातील सर्वात यशस्वी निवासी बाजार ठरले आहे, असे क्रेडाई–लायसेस फोरास यांच्या वार्षिक अहवालात स्पष्ट करण्यात आले आहे. या अहवालानुसार, केवळ ग्रेटर मुंबईने १,३३,००५ कोटी रुपयांची निवासी विक्री मूल्य नोंदवून देशाला थक्क केले आहे. यामध्ये विशेषतः २ कोटी ते ५ कोटी रुपयांच्या उच्च-मूल्य श्रेणीतील घरांना सर्वाधिक पसंती मिळाली असून, मुंबईत प्रीमियम हाऊसिंगची लाट असल्याचे यातून अधोरेखित झाले आहे.
पुरवठा ट्रेंड्सकडे पाहता, १ कोटी रुपये ते ५ कोटी रुपये किमतीतील २बीएचके घरांना मोठी मागणी असून, १बीएचके युनिट्सची मागणी मुख्यतः ५० लाख रुपये ते २ कोटी रुपये या श्रेणीत केंद्रित असल्याचे दिसून येते. सध्या ग्रेटर मुंबईत २,६६३ प्रकल्पांचे काम सुरू असून, सुमारे २० महिन्यांचा 'इन्व्हेंटरी' (शिल्लक घरे) उपलब्ध आहे, ज्यामुळे मागणी आणि पुरवठ्यात उत्तम संतुलन दिसून येत आहे. सुधारित कनेक्टिव्हिटी आणि पायाभूत सुविधांमुळे ठाणे आणि नवी मुंबईत घरांच्या किमतीत ४.५% वाढ नोंदवण्यात आली आहे. उच्च-मध्यम आणि प्रीमियम सेगमेंटमध्ये ठाणे आघाडीवर आहे. तर मध्यम-आय आणि नवीन प्रीमियम प्रकल्पांसाठी नवी मुंबई हे ग्राहकांचे आवडीचे केंद्र बनले आहे. २०२५ मध्ये एमएमआरमध्ये घरांच्या किमतीत होणारी वाढ स्थिर राहिली आहे.
कल्याण-डोंबिवली हा भागही उपनगरीय हब म्हणून वेगाने विकसित होत असून, २०२५ मध्ये येथे एचपीआय ३.०% पर्यंत पोहोचला. परवडणाऱ्या किमती आणि सुधारित पायाभूत सुविधांमुळे या भागात ₹७५ लाखांपर्यंतच्या घरांना विशेष मागणी आहे. याशिवाय, वसई–विरार आणि मीरा-भायंदरसारख्या परिघीय भागांतही स्थिर मागणी कायम आहे. २०२५ मध्ये या बाजारांत एचपीआय २.१% नोंदवला गेला असून, परवडणाऱ्या आणि मध्यम-आय गटातील घरांकडे खरेदीदारांचा कल दिसून येतो.
ग्रेटर मुंबईत हाऊसिंग प्राईस इंडेक्स ३.४% नोंदवण्यात आला, जो या क्षेत्राचा मजबूत आर्थिक पाया आणि गुंतवणूकदारांचा विश्वास दर्शवतो.अहवालात नमूद केल्याप्रमाणे, एमएमआरमधील ही सातत्यपूर्ण वाढ प्रामुख्याने सुरू असलेल्या पायाभूत सुविधा प्रकल्पांमुळे, सुधारित कनेक्टिव्हिटीमुळे आणि मजबूत आर्थिक आधारामुळे शक्य झाली आहे. यामुळे प्रमुख मायक्रो-मार्केट्समध्ये एंड-यूजर्स आणि गुंतवणूकदारांची मागणी पुढील काळातही कायम राहण्याची शक्यता वर्तवण्यात आली आहे.