मुंबई : वडाळ्यातील आणिक आगार ते गेटवे ऑफ इंडिया या भुयारी मेट्रो ११ मार्गिकेतील आर्थिक अडचणी आता दूर होणार आहेत. या मार्गिकेसाठी सुमारे २३ हजार ४८७ कोटी रुपये खर्च अपेक्षित आहे. प्रकल्पासाठी येणाऱ्या खर्चाची रक्कम कर्ज आणि दुय्यम कर्जातून उभारली जाणार आहे. त्यानुसार या प्रकल्पासाठी जपान आंतरराष्ट्रीय सहकार्य संस्थेने (जायका) ५ हजार ५०० रुपयांचे कर्ज दिले आहे. जपानी अधिकृत विकास सहाय्य (ओडीए) कर्जरुपाने हे कर्ज देण्यात आले. यामुळे प्रकल्पाच्या कामाला येणार वेग येणार आहे.
केंद्र सरकारच्या वित्त मंत्रालयाच्या आर्थिक व्यवहार विभागाचे संयुक्त सचिव आलोक तिवारी आणि जेआयसीए इंडिया कार्यालयाचे मुख्य प्रतिनिधी टेकुची ताकुरो यांनी नवी दिल्लीत या कर्जाच्या करारावर नुकतीच स्वाक्षरी केली. जायकाकडून ५ हजार ५०० कोटी रुपयांचे कर्ज मिळाल्याने मेट्रो-११ मार्गिकेतील आर्थिक अडचणी दूर होण्यास मदत होणार आहे. वडाळा - ठाणे - कासारवडवली मेट्रो-४ मार्गिकेचा विस्तार वडाळा ते गेट वे ऑफ इंडिया दरम्यान मेट्रो-११ मार्गिकेच्या माध्यमातून केला जाणार आहे. त्यानुसार आणिक आगार, वडाळा ते गेट वे ऑफ इंडिया अशी १७.५१ किमीची ही भुयारी मार्गिका असणार असून यात १४ मेट्रो स्थानकांचा समावेश आहे. १४ मेट्रो स्थानकांपैकी एक स्थानक उन्नत असणार असून उर्वरित १३ स्थानके भुयारी असणार आहेत. या मार्गिकेस राज्य सरकारने मान्यता दिली असून आता या प्रकल्पाच्या प्रस्तावास केंद्र सरकारच्या मान्यतेची प्रतीक्षा आहे.