यवतमाळ : वर्धा येथून नांदेडच्या दिशेने प्रवाशांना घेऊन जाणाऱ्या एका मिनी ट्रॅव्हल्सला यवतमाळ शहराजवळील भारी विमानतळ परिसरात भीषण आग लागल्याची धक्कादायक घटना घडली आहे. या आगीत MH २७००५९ क्रमांकाचे हे वाहन पूर्णतः जळून खाक झाले असून, सुदैवाने सर्व प्रवासी वेळीच बाहेर पडल्याने मोठा अनर्थ टळला आहे.
-‘पवित्र’ पोर्टलद्वारेच होणार नियुक्त्या; खासगी संस्थांना ‘रोस्टर’चे बंधन, राज्यातील हजारो उमेदवारांना दिलासा मुंबई : राज्यातील जिल्हा परिषदा आणि ...
मिळालेल्या माहितीनुसार, सदर मिनी ट्रॅव्हल्स वर्ध्याहून नांदेडकडे जात असताना यवतमाळनजीकच्या भारी विमानतळ परिसरात पोहोचली. यावेळी चालकाला अचानक वाहनातून धूर येत असल्याचे आणि आगीच्या ठिणग्या निघत असल्याचे लक्षात आले. प्रसंगावधान राखून चालकाने तात्काळ वाहन थांबवले आणि आतील प्रवाशांना खाली उतरण्याची विनंती केली. ट्रॅव्हल्समध्ये सुमारे १० प्रवासी प्रवास करत होते. सर्व प्रवासी खाली उतरताच काही क्षणातच आगीने रौद्र रूप धारण केले आणि संपूर्ण वाहन आगीच्या भक्ष्यस्थानी सापडले.
आगीची तीव्रता इतकी भीषण होती की, बघता बघता संपूर्ण ट्रॅव्हल्सचा कोळसा झाला. भररस्त्यात लागलेल्या या आगीमुळे परिसरात काही काळ भीतीचे वातावरण निर्माण झाले होते. घटनेची माहिती मिळताच संबंधित यंत्रणांनी धाव घेतली असून पुढील तपास सुरू करण्यात आला आहे. प्राथमिक अंदाजानुसार शॉर्ट सर्किटमुळे ही आग लागली असावी, अशी शक्यता वर्तवण्यात येत आहे. जीवितहानी टळली असली तरी वाहनाचे मात्र मोठे आर्थिक नुकसान झाले आहे.