- निधनाच्या ३ महिन्यांनंतर विक्रम गोखले यांच्या अंतिम सिनेमाचे पोस्टर रिलीज
मराठी-हिंदी सिनेसृष्टीतील दिग्गज अभिनेते, दिवंगत विक्रम गोखले यांचा अखेरचा सिनेमा लवकरच प्रेक्षकांच्या भेटीला येत आहे. अतिशय हृदयस्पर्शी कथा असलेला 'बेवारस' हा सिनेमा आता प्रेक्षकांच्या भेटीला येणार असून, गुढी पाडव्याच्या शुभमुहूर्तावर या सिनेमाचं पोस्टर लाँच करण्यात आलं आहे.
या सिनेमात विक्रम गोखलेंसह तेजस्विनी पंडित, रोहिणी हट्टंगडी, उषा नाईक, निहार गिते, ऋतुजा बागवे, उदय टिकेकर, विद्याधर जोशी, श्रीजित मराठे, आदित्य देशमुख यांच्या मुख्य भूमिका आहेत. डोळे भरून आलेल्या विक्रम गोखले यांनी एका लहान मुलाला मिठी मारल्याचं चित्र पोस्टरवर असून पोस्टरप्रमाणेच सिनेमाची कथा देखील अत्यंत हृदयस्पर्शी आहे.
या सिनेमात विक्रम गोखले यांनी अनाथालय चालवणाऱ्या तत्त्वनिष्ठ आबाजींची भूमिका साकारली आहे. विक्रम गोखलेंची अखेरची कलाकृती असलेल्या या सिनेमाविषयी प्रेक्षकांमध्ये आता उत्सुकता निर्माण झाली असल्याचे पाहायला मिळत आहे. मात्र, या सिनेमाच्या प्रदर्शनाची तारीख अद्याप समोर आलेली नाही. पण पोस्टरने सगळ्यांचं लक्ष वेधून घेतलं आहे.
सिनेमाची रिलीज डेट लवकरच जाहीर केली जाणार आहे. २६ नोव्हेंबर २०२२ रोजी विक्रम गोखले यांचं निधन झालं. वयाच्या ७७ व्या वर्षी त्यांनी अखेरचा श्वास घेतला.
आता त्यांच्या हा शेवटचा सिनेमा पाहण्यासाठी चाहत्यांमध्ये प्रचंड प्रमाणात उत्सुकता असल्याचे पाहायला मिळत आहे.