ठाणे: ठाणे जिल्ह्यातील डोंबिवली एमआयडीसीतील कंपन्यांमध्ये होणाऱ्या स्फोटावरुन सातत्याने येथील सुरक्षेचा आढावा घेतला जातो. परंतु, पुन्हा त्याची पुनरावृत्ती होतानाचे पाहायला मिळत आहे. अंबरनाथमधील आनंदनगर एमआयडीसीमध्ये आज केमिकल कंपनीत भीषण स्फोट झाल्याची घटना घडली. या स्फोटानंतर आगीचा भडका आणि धुराचे मोठ-मोठे लोट पसरल्याचंही दिसून आलं.
स्फोटानंतर कंपनीतील केमिकल रस्त्यावर आल्याने रस्त्यावर देखील आगीचा भडका पाहायला मिळाला, धुराचेही लोटही दूरवर पसरले होते. स्फोट होताच कंपन्यांमधील कामगारांनी हातातील काम थांबवत जिवाच्या आकांताने धाव घेतली. कामगार रस्त्यावर सैरावैरा धावताना दिसून आले.
दरम्यान, आगीचे वृत्त समजताच घटनास्थळी अग्निशमन दलाच्या गाड्या दाखल झाल्या आहेत. मात्र, केमिकल कंपनीतील आगीने रौद्ररूप धारण केल्याने आग आटोक्यात आणण्यात अडथळे येत आहेत. कंपनीत आगीमुळे मोठमोठे स्फोट होत असल्याने कामगारांची धावपळ पाहायला मिळत असून, कंपनीतील विविध केमिकलमुळे विविध ठिकाणी स्फोट होत आहेत.
एमआयडीसीमधील गणेश केमिकल नावाच्या कंपनीला ही आग लागली आहे. आगीचा भडका इतक्या मोठ्या प्रमाणात उडाला की, शेजारी असलेल्या मिरॅकल केबल आणि क्लाउड नाईन या कंपन्यांनादेखील आग लागली असल्याची प्राथमिक माहिती आहे.