भिवंडी: सोशल मीडियाच्या माध्यमातून मैत्री करून एका अल्पवयीन मुलीचं लैंगिक शोषण करणाऱ्या आणि तिला आंतरधर्मीय विवाहासाठी धमकावणाऱ्या २० वर्षीय तरुणाला पोलिसांनी अटक केली आहे. भिवंडीत टेलर म्हणून काम करणाऱ्या तरुणाने संबंधित मुलीवर अत्याचार करून तिला धर्मांतरासाठी भाग पाडल्याचा धक्कादायक प्रकार समोर आला आहे.
मिळालेल्या माहितीनुसार, २०२४ मध्ये आरोपी आणि पीडित मुलगी यांची सोशल मीडियाच्या माध्यमातून ओळख झाली होती. त्यावेळी आरोपी १८ वर्षांचा होता, तर मुलगी अल्पवयीन होती. हळूहळू या मैत्रीचे रूपांतर प्रेमसंबंधात झाले. मात्र, आरोपीने तिच्या अल्पवयीन असण्याचा फायदा घेऊन तिच्यावर वारंवार शारीरिक अत्याचार केल्याचा आरोप आहे. गेल्या दोन वर्षांपासून हे शोषण सुरू होतं.
विवाहासाठी दबाव आणि 'निकाह'चा घाट
गेल्या महिन्यात पीडित मुलगी १८ वर्षांची झाल्यावर आरोपीनं तिच्यावर लग्नासाठी (निकाह) दबाव टाकण्यास सुरुवात केली. त्यासाठी त्याने तिला ब्लॅकमेलही केल्याचं पोलीस तपासात समोर आलं आहे. ६ मार्च रोजी निकाहसाठी मुलगी भिवंडीत पोहोचली होती. पण, एका हिंदुत्ववादी संघटनेला याची कुणकुण लागली आणि त्यांनी मुलीच्या नातेवाईकांना या घटनेची माहिती दिली. यानंतर हा धक्कादायक प्रकार उघडकीस आला.
निकाहचा पर्दाफाश
विवाहाचा विधी (निकाह) पार पडण्यापूर्वीच हिंदुत्ववादी संघटनेच्या कार्यकर्त्यांनी घटनास्थळी धाव घेत मुलीची तिथून सुटका केली. त्यानंतर मुलीला स्थानिक पोलीस ठाण्यात नेण्यात आलं. मुलीच्या तक्रारीवरून पोलिसांनी गुन्हा दाखल केला असून पुढील तपासासाठी हे प्रकरण संबंधित पोलीस ठाण्याकडे वर्ग करण्यात आलं आहे.
डोंबिवली पोलिसांनी आरोपीला पॉक्सो (POCSO) कायदा आणि भारतीय दंड संहितेच्या (IPC) विविध कलमान्वये अटक केली आहे. हा गुन्हा २०२४ मध्ये घडल्याने, नवीन भारतीय न्याय संहितेऐवजी आयपीसी अंतर्गत कलमे लावण्यात आली आहेत. सहायक पोलीस आयुक्त सुहास हेमाडे यांनी दिलेल्या माहितीनुसार, शारीरिक संबंध प्रस्थापित झाल्यानंतर आरोपी मुलीवर लग्नासाठी सातत्याने दबाव आणि ब्लॅकमेलिंग करत होता. या प्रकरणाचा पुढील तपास पोलीस करत असून, यामागे आणखी कोणाचा हात आहे का? याचा शोध घेतला जात आहे.