बीजिंग : भारत आणि चीन यांनी एकमेकांना प्रतिस्पर्धी म्हणून नव्हे तर भागीदार म्हणून पाहिले पाहिजे. दोन्ही देशांनी एकमेकांकडे धोका म्हणून नव्हे तर संधी म्हणून पाहण्याची गरज आहे, असे चीनचे परराष्ट्रमंत्री वांग यी यांनी रविवारी सांगितले.
चीनच्या संसद नॅशनल पीपल्स काँग्रेस (एनपीसी) च्या अधिवेशनादरम्यान आयोजित वार्षिक पत्रकार परिषदेत वांग यी बोलत होते. ते म्हणाले की दोन्ही देशांनी पंतप्रधान नरेंद्र मोदी आणि राष्ट्राध्यक्ष शी जिनपिंग यांनी ठरवून दिलेल्या दिशानिर्देशांनुसार संबंध पुढे नेले पाहिजेत. चीनच्या परराष्ट्रमंत्र्यांनी असेही सांगितले की दोन्ही देशांनी ब्रिक्स शिखर परिषदेच्या आयोजनात एकमेकांना पाठिंबा दिला पाहिजे. यावर्षी भारत ब्रिक्स परिषदेचे यजमानपद भूषवणार आहे, तर २०२७ मध्ये चीन या परिषदेचे आयोजन करणार आहे.
वांग यी यांनी सांगितले की गेल्या वर्षी तियानजिन येथे नरेंद्र मोदी आणि शी जिनपिंग यांची झालेली भेट सकारात्मक ठरली होती. त्यांनी म्हटले की २०२४ मध्ये रशियातील कजान येथे झालेल्या बैठकीमुळे दोन्ही देशांच्या संबंधांना नवी सुरुवात मिळाली आणि त्यानंतर तियानजिनमध्ये झालेल्या चर्चेमुळे संबंध अधिक सुधारण्यास मदत झाली.ते म्हणाले की अलीकडच्या काळात दोन्ही देशांदरम्यान राजनैतिक संवाद, व्यापार आणि लोकांमधील संपर्क वेगाने वाढला आहे. द्विपक्षीय व्यापाराने नवा विक्रम प्रस्थापित केला असून त्याचा थेट फायदा दोन्ही देशांच्या जनतेला झाला आहे.
भविष्यातील दिशेबाबत बोलताना वांग यी म्हणाले की भारत आणि चीन यांनी शेजारी देश म्हणून मैत्री कायम ठेवली पाहिजे आणि सीमावर्ती भागात शांतता व स्थैर्य सुनिश्चित केले पाहिजे. तसेच दोन्ही देशांनी विकास आणि सहकार्यावर अधिक भर द्यायला हवा. ते म्हणाले की भारत आणि चीन हे ग्लोबल साउथमधील महत्त्वाचे देश आहेत आणि दोघांमध्ये सखोल ऐतिहासिक व सांस्कृतिक संबंध आहेत. परस्पर विश्वास आणि सहकार्यामुळे दोन्ही देशांच्या विकासाला गती मिळू शकते, तर संघर्ष आणि विभाजन आशियाच्या विकासासाठी हानिकारक ठरू शकते.
दरम्यान, पूर्व लदाख येथे झालेल्या लष्करी तणावामुळे भारत-चीन संबंध जवळपास पाच वर्षे थंडावले होते. मात्र २०२४ मध्ये कजान येथे पंतप्रधान नरेंद्र मोदी आणि शी जिनपिंग यांच्या भेटीनंतर संबंध सामान्य करण्याची प्रक्रिया सुरू झाली. त्यानंतर दोन्ही देशांनी व्हिसा आणि उड्डाण सेवा पुन्हा सुरू करण्यासह अनेक पावले उचलली, ज्यामुळे संबंधांमध्ये हळूहळू सुधारणा दिसून येत आहे.