मुंबई : वर्ल्ड कपचा अंतिम सामना जसजसा जवळ येऊ लागला आहे, तसतशी प्रेक्षकांमध्ये सामन्याबद्दलची उत्सुकता वाढली आहे. अशातच क्रिकेटविश्वातून आणखी एक दुःखद वार्ता समोर आली आहे. काही दिवसांपूर्वी भारतीय फलंदाज रिंकू सिंग यांच्या वडिलांचे निधन झाले होते. त्यानंतर आता श्रीलंकेचा दिग्गज माजी कर्णधार आणि यष्टिरक्षक फलंदाज कुमार संगकारा यांच्यावरही दुःखाचा डोंगर कोसळला आहे.
संगकारांच्या वडिलांचे निधन
मिळालेल्या माहितीनुसार, संगकारांचे वडील क्षेमा संगकारा यांचे ३ मार्च रोजी निधन झाले. ते श्रीलंकेतील कॅंडी येथील कोर्टात प्रसिद्ध वकील होते. वडिलांच्या निधनाची बातमी कळताच विश्वचषक स्पर्धेत समालोचनाची जबाबदारी सांभाळत असलेले संगकारा तातडीने मायदेशी रवाना झाले. ४ मार्च रोजी अंत्यसंस्कार पार पडणार असल्याची माहिती कुटुंबीयांकडून देण्यात आली.
कुटुंबीयांनी प्रसिद्ध केलेल्या निवेदनात त्यांच्या जाण्याने कुटुंब आणि परिचितांमध्ये मोठी पोकळी निर्माण झाल्याचे नमूद करण्यात आले आहे.
रिंकू सिंग यांच्यावरही शोक
याआधी भारतीय संघाचा आक्रमक फलंदाज रिंकू सिंग यांचे वडील खानचंद सिंग यांचेही अलीकडेच निधन झाले होते. सुपर ८ फेरीतील सामन्यानंतर ही घटना घडली होती. त्यानंतर रिंकू तातडीने घरी परतला आणि पुढे पुन्हा जोमाने संघात सहभागी झाला.
अंतिम सामन्यापूर्वी परतण्याची शक्यता
दरम्यान, विश्वचषकाच्या अंतिम सामन्यापूर्वी संगकारा पुन्हा समालोचन पॅनेलमध्ये दिसतील, अशी अपेक्षा व्यक्त केली जात आहे. मात्र, याबाबत अधिकृत घोषणा अद्याप झालेली नाही.