गेल्या काही महिन्यांपासून बॉलिवूड गँगस्टर्सच्या निशाण्यावर आहे. सुप्रसिद्ध दिग्दर्शक रोहित शेट्टी यांच्या घरावर झालेल्या गोळीबारानंतर आता रणवीर सिंग लॉरेन्स बिश्नोई टोळीच्या निशाण्यावर आहे.
रणवीरला बिष्णोई गँगकडून तब्बल दहा कोटी रुपयांची खंडणी मागण्यात आली होती. रणवीरच्या मॅनेजरला एका अमेरिकन मोबाइल नंबरवरून धमकीचा व्हॉइस नोट पाठवण्यात आला होता.
सूत्रांच्या माहितीनुसार, या फोनची सविस्तर माहिती मिळवण्यासाठी मुंबई क्राइम ब्रांचने ठरलेल्या प्रोटोकॉलनुसार अमेरिकेतील संबंधित यंत्रणेशी संपर्क साधला आहे. पोलिसांच्या तपासात असंही समोर आलं आहे की, बिष्णोई गँगचा जवळचा साथीदार हॅरी बॉक्सर याने व्हॉइस नोट पाठवून रणवीरला धमकी दिली आणि दहा कोटी रुपयांची मागणी केली. रणवीरच्या मॅनेजरच्या व्हॉट्सअॅपवर आलेल्या व्हॉइस नोटमधील आवाज हा हॅरी बॉक्सरचाच असल्याची पुष्टी झाल्याचं सूत्रांनी सांगितलं आहे. मात्र, यासंदर्भातील इतर ठोस पुरावे गोळा करण्याचं काम क्राइम ब्रांचकडून सुरू आहे.
गेल्या काही दिवसांत बॉलिवूड सेलिब्रिटींना गँगस्टरकडून टारगेट करण्याचं प्रमाण वाढलं आहे. बिष्णोई गँगकडून आधी सातत्याने अभिनेता सलमान खानला धमक्या दिल्या जात होत्या. त्याच्याही वांद्रे इथल्या घराबाहेर गोळीबाराची घटना घडली होती. त्यानंतर त्याच्या सुरक्षेत वाढ करण्यात आली. आता बॉलिवूड इंडस्ट्रीतील इतर सेलिब्रिटींवरही निशाणा साधला जातोय.