विरोधी पक्षनेते राहुल गांधी यांना गोळ्या घालण्याची धमकी देणाऱ्या करणी सेनेच्या एका कार्यकर्त्याचा व्हिडीओ व्हायरल झाला आहे. काँग्रेस प्रवक्ते पवन खेरा यांनी गुरुवारी (१९ फेब्रुवारी) हा व्हिडिओ 'एक्स' वरून शेअर केला आहे. हा व्हिडिओ व्हायरल झाल्यानंतर राजकीय वातावरण तापले आहे.
जय महाकाल, जय ओम बिर्ला, जय नरेंद्र मोदी. ज्या प्रकारे काँग्रेसच्या २५ खासदारांनी भारताच्या संसदेत घुसून लोकसभा अध्यक्ष ओम बिर्ला यांना शिवीगाळ केली. त्यामुळे भाजपा आणि करणी सेनेच्या कार्यकर्त्यांमध्ये संताप आहे, पुन्हा अशी घटना घडली, तर राहुल गांधींना घरात घुसून गोळ्या घालू", अशी धमकी देणारा व्हिडीओ समोर आला आहे. काँग्रेसच्या नेत्यांकडून हा व्हिडीओ पोस्ट केला गेला आहे.
करणी सेनेच्या नेत्याकडून ही धमकी दिली गेली आहे. व्हिडीओमध्ये म्हटले आहे की, "राहुल गांधी यांच्या सांगण्यावरून हे केलं गेलं आहे. राहुल गांधींनी नीट ऐकावे, पुन्हा असे घडले तर घरात घुसून गोळ्या घालून मारू आणि याला प्रशासन जबाबदार असेल. २५ खासदारांवर कारवाई झाली पाहिजे. मोदी सरकारचे मंत्री किरण रिजिजू यांच्याकडून जे विधान केले गेले आहे, ते ऐकल्यापासून आम्ही खूप रागात आहोत, जर पुढच्या २४ तासांच्या आत त्या खासदारांना अटक झाली नाही तर प्रत्येकाला आम्ही गोळ्या घालू." अशा धमकी करणी सेनेकडून देण्यात आली आहे.
नेमकं प्रकरण काय?
केंद्रीय मंत्री किरेन रिजिजू यांनी गुरुवारी (१२ फेब्रुवारी) लोकसभा अध्यक्ष ओम बिर्ला यांच्या सभागृहातील एक व्हिडिओ शेअर केला. ४ फेब्रुवारी रोजी संसदेत विरोधी पक्ष आणि सरकार यांच्यात झालेल्या संघर्षादरम्यान काँग्रेस खासदारांच्या एका मोठ्या गटाने त्यांना शिवीगाळ केली आणि पंतप्रधान नरेंद्र मोदींना धमकावले असा आरोप त्यांनी केला. या व्हिडिओमध्ये लोकसभा अध्यक्षांच्या दालनात काँग्रेस पक्षाच्या महिला खासदार दिसत आहेत, जिथे त्या भाजप मंत्र्यांशी वाद घालताना दिसत आहेत.