नाशिक: सप्तश्रृंगी देवीच्या दर्शनासाठी वणीगडाकडे जाणाऱ्या भाविकांच्या कारला नाशिक-कळवण मार्गावर भीषण अपघाताचा सामना करावा लागला आहे. दोन कारची समोरासमोर जोरदार धडक झाल्याने झालेल्या या अपघातात दोन्ही वाहनांतील ६ ते ७ जण गंभीर जखमी झाले आहेत.
हा अपघात इतका भीषण होता की, दोन्ही गाड्यांच्या समोरील भागाचा अक्षरशः चक्काचूर झाला आहे. अपघाताचा मोठा आवाज होताच परिसरातील स्थानिक नागरिकांनी तातडीने घटनास्थळी धाव घेतली. गाड्यांमध्ये अडकलेल्या जखमींना नागरिकांनी मोठ्या शर्थीने बाहेर काढले.
जखमींची प्रकृती चिंताजनक असल्याने त्यांना तातडीने रुग्णवाहिकेने जवळच्या शासकीय रुग्णालयात उपचारासाठी दाखल करण्यात आले आहे. भररस्त्यात दोन गाड्या एकमेकांना धडकल्याने नाशिक-कळवण मार्गावरील वाहतूक काही काळासाठी पूर्णपणे ठप्प झाली होती. रस्त्याच्या दोन्ही बाजूंना वाहनांच्या लांबच लांब रांगा लागल्या होत्या. अपघाताची माहिती मिळताच पोलिसांनी घटनास्थळी पोहोचून अपघातग्रस्त वाहने बाजूला सारली आणि वाहतूक सुरळीत करण्याचे प्रयत्न सुरू केले.
सध्या वणीगडावर भाविकांची मोठी गर्दी होत असून, घाटातील आणि महामार्गावरील वाहतूक वाढली आहे. अशा वेळी वाहनांच्या वेगावर नियंत्रण ठेवणे आणि वळणांवर सावधगिरी बाळगणे अत्यंत आवश्यक असल्याचे आवाहन प्रशासनाकडून करण्यात येत आहे.