मुंबई: भारतात पेमेंट करण्याची पद्धत पूर्णपणे बदलली आहे. पूर्वी लोकांना प्रत्येक खरेदीसाठी रोखीने पैसे द्यावे लागत होते. आता, बरेच लोक ऑनलाइन पेमेंटचा अवलंब करू लागले आहेत. बरेच वापरकर्ते यूपीआयद्वारे पेमेंट करतात. यूपीआय वापरून पेमेंट करणे खूप सोपे आहे.
पण अलिकडेच सोशल मीडियावर एक बातमी फिरत आहे की, आता यूपीआय पेमेंटवर शुल्क आकारले जाणार आहेत. हे खरे आहे का असा प्रश्न अनेकांना पडला आहे. चला या बातमीमागील सत्य जाणून घेऊया. यूपीआय पेमेंटसाठी खरोखरच शुल्क आकारले जाणार आहेत का? चला तर मग जाणून घेऊयात...
यूपीआय पेमेंटसाठी काही शुल्क आकारले जातील का?
सोशल मीडियावर एक बातमी वेगाने व्हायरल होत आहे की आता प्रत्येक यूपीआय पेमेंटवर शुल्क आकारले जाणार आहेत. लोक आता क्यूआर (QR) कोड स्कॅन करण्यास कचरत आहेत. पण काही नाही. सरकारने स्पष्टपणे सांगितले आहे की, यूपीआय (UPI) व्यवहार सामान्य वापरकर्त्यांसाठी पूर्वीप्रमाणेच पूर्णपणे मोफत राहतील. हा दावा अफवा आहे आणि त्याला कोणताही अधिकृत आधार नाही.
डिजिटल पेमेंट सोपे ठेवण्यासाठी सराकारच्या धोरणात कोणताही बदल झालेला नाही. किराणा, कॅब, ऑनलाइन शॉपिंग, बिल पेमेंट किंवा छोटे खर्च असोत, कोणत्याही अतिरिक्त शुल्काशिवाय यूपीआय सर्वत्र वापरता येते. काळजी करण्याची गरज नाही. QR स्कॅन करा आणि काळजी न करता पैसे द्या.
अर्थसंकल्पात वेगळी तरतूद
डिजिटल व्यवहारांना अधिक बळकटी देण्यासाठी, केंद्र सरकारने २०२६-२७ च्या अर्थसंकल्पात UPI आणि RuPay डेबिट कार्ड व्यवहारांसाठी २ हजार कोटी रुपयांचे अनुदान वाटप केले आहे. ही तरतूद व्यापारी सवलत दर मॉडेलला पाठिंबा देण्यासाठी आहे, जेणेकरून व्यापाऱ्यांवर अतिरिक्त दबाव येऊ नये.
सरकारच्या या पावलामुळे हे स्पष्ट होते की, सध्यातरी UPI पूर्णपणे मोफत राहील. लहान दुकानदार, रस्त्यावरील विक्रेते आणि सामान्य ग्राहक काळजी न करता डिजिटल पेमेंट करणे सुरू ठेवू शकतात. UPI अजूनही सुरक्षित, जलद आणि कोणत्याही शुल्काशिवाय आहे. याचा अर्थ असा की UPI शुल्काबाबत सोशल मीडियावर फिरणाऱ्या बातम्या खोट्या आहेत.