मुंबई : फेब्रुवारीच्या पहिल्या आठवड्यात कोरडे वातावरण राहिल्यानंतर आता राज्यात हवामानाची घडी बदलताना दिसत आहे. उत्तर भारतात सक्रिय झालेल्या वातावरणाचा परिणाम महाराष्ट्रावरही जाणवू लागणार असून येत्या १७ आणि १८ फेब्रुवारीदरम्यान काही भागांत हलक्या स्वरूपाचा पाऊस होण्याची शक्यता वर्तवली जात आहे.
हवामान तज्ज्ञांच्या मते, समुद्राकडून येणाऱ्या ओलसर वाऱ्यांचा आणि जमिनीवरील तापमानातील फरकाचा परिणाम म्हणून कमी दाबाची रेषा तयार होत आहे. या परिस्थितीमुळे पुणे विभागासह मध्य महाराष्ट्रात ढगाळ वातावरण राहू शकते. काही ठिकाणी किरकोळ सरी पडण्याची शक्यता आहे. हा पाऊस जास्त वेळ राहणारा नसला तरी स्थानिक पातळीवर बदल जाणवू शकतो.
दरम्यान, राज्यात उत्तर दिशेकडून येणाऱ्या थंड वाऱ्यांचा प्रभाव कायम आहे. त्यामुळे किमान तापमानात किंचित घट झाली असून रात्रीचा गारवा वाढला आहे. विशेषतः उत्तर महाराष्ट्र, विदर्भ आणि खान्देश भागात सकाळ-संध्याकाळ थंडीची जाणीव होत आहे. पुढील एक-दोन दिवस ही स्थिती कायम राहू शकते.
दक्षिणेकडे मात्र परिस्थिती वेगळी आहे. बंगालच्या उपसागरात निर्माण होत असलेली कमी दाबाचा पट्टा तीव्र होण्याची शक्यता असून त्याचा परिणाम तामिळनाडू आणि केरळ राज्यांवर होऊ शकतो. काही भागांत मध्यम ते जोरदार पावसाचा अंदाज व्यक्त करण्यात आला आहे.
राज्यातील शेतकऱ्यांनी पुढील काही दिवस हवामानातील बदल लक्षात घेऊन शेतीची कामे नियोजनपूर्वक करावीत, असे आवाहन करण्यात आले आहे. ढगाळ वातावरणामुळे काही पिकांवर परिणाम होऊ शकतो, त्यामुळे आवश्यक ती काळजी घेण्याचा सल्ला तज्ज्ञांनी दिला आहे.